86-нҗы хекая

Йылдыз адамлара ёл гөркезйәр

СУРАТДА бир адамың ягты йылдызы гөркезип дураныны гөрйәңми? Бу йылдыз олар Иерусалимден чыканда пейда болды. Олар Гүндогардан. Олар йылдызлары өвренйәр. Шонуң үчин тәзе йылдыз бир бейик адамың янына элтйәндир өйдйәрлер.

Олар Иерусалиме гелип: «Ехудыларың патышасы болҗак чага ниреде?» дийип сораярлар. Ысрайыллылара «ехудылар» хем диййәрлер. Бу адамлар: «Биз Гүндогарда чаганың йылдызыны гөрүп, сежде этмәге гелдик» диййәрлер.

Иерусалимиң патышасы Хиродес муны эшидип, ховсала дүшйәр. Ол өз ерине башга бириниң патыша болмагыны ислемейәр. Шонуң үчин Хиродес руханылары чагырып: «Вада эдилен патыша ниреде догулмалы?» дийип сораяр. Олар: «Мукаддес Язгыларың айтмагына гөрә, Бейтуллахамда догулмалы» дийип, җогап берйәрлер.

Шонда Хиродес Гүндогардан гелен адамлары янына чагырып: «Барың-да, чаганы тапың. Оны тапаныңызда маңа хабар эдиң. Менем онуң янына барып сежде эдесим гелйәр» диййәр. Аслында, Хиродес чаганы тапып өлдүрҗек боляр.

Шондан соң, йылдыз адамлары Бейтуллахама гетирип, чаганың болян ерине гелип дуряр. Олар өе гирип, чаганы ве онуң эҗеси Меръеми гөрйәрлер. Шонда олар совгатларыны чыкарып, Иса бердилер. Эмма Ехова оларың дүйшүне гирип, Хиродесиң янына бармаң диййәр. Олар хем өз юрдуна башга ёл билен гидйәрлер.

Хиродес гүндогарлы адамларың гиденини эшиденде, гаты гахары гелйәр. Ол Бейтуллахамдакы огланларың ики яшлысына ченли, хеммесини өлдүрмеги буюряр. Эмма бу барада Ехова Юсуба дүйшүнде дуйдуряр. Ол хем машгаласыны алып, Мүсүре гачяр. Соңра Хиродесиң өленини эшидип, Юсуп Меръеми ве Исаны алып, өйүне Насыра шәхерине доланяр. Бу ерде Исаның яшлыгы гечйәр.

Сениң пикириңче, бу тәзе йылдызы ким ибердикә? Бу адамларың йылдызы гөренде, илки Иерусалиме угранлары ядыңдадыр. Худайың Оглуны Шейтан Иблис өлдүрҗек боляр. Ол Иерусалимиң патышасы Хиродесиң хем өлдүрҗекдигини билйәрди. Диймек, бу йылдызы Шейтан иберен болмалы.

Матта 2:1—23; Мика 5:2.