¿WAN maʼ xbʼobʼ awil ja kʼanal jel xlijpi wan xchʼutjel june ja winik bʼa dibujo? Ja yeʼnle ti jakye ja bʼa wa x-elkʼen ja Kʼaʼuji sok wa skʼintane ja kʼanali. Wa skʼuʼane ja kʼanal it oj ijuke och bʼa jun jasunuk jel tʼilan.

Yajni ja winike kʼotye bʼa Jerusalén, sjobʼowe: «¿Bʼa wa xtax ja yal kerem oj och mandaranum sbʼaja judío jumasaʼ?». «Judíoʼik» jaʼa pilan sbʼiʼil ja israʼelenyo jumasaʼ, soka winike yalawe: «Man bʼa wa x-elkʼen ja Kʼaʼuji kilatikon ja skʼanali sok jakum katikon yi stoyjel».

Yajni ja mandaranum bʼa Jerusalén, ja Herodes, yabʼ sbʼaja yal keremi, kʼe yolom. Ja yeʼn mi skʼana pilan mandaranum maʼ oj yikan ja xcholi. Ja yuj sjobʼo yi ja mero olomalik bʼa templo: «¿Bʼa oj pojkuk ja mandaranum kʼapubʼali?». Ja olomaliki sjakʼawe: «Ti bʼa Belén, jastal ni wa xyala ja Biblia».

Anto Herodes yala yabʼ ja winik jakele bʼa wa x-elkʼen ja Kʼaʼuji: «Kax leʼawik ja yal keremi. Yajni xa taʼawex, ti xjaka wal-ex kabʼ. Ja keʼn ojni cha waj kaʼ yi stoyjel». ¡Herodes mi meranuk ja jasa wa xyala: ja yeʼn wa skʼana oj smil ja yal keremi!

Yajni ja winike elye ja bʼa Jerusalén, anto ja kʼanali nijki sok bʼajtan ay och bʼa stiʼ sate man kʼotye bʼa Belén sok tixa kan tekʼan bʼa lugar wa xtax ja yal keremi. Ja winike ochye bʼa yojol ja naʼitsi sok staʼawe kʼot ja yal kerem Jesús soka snan, María. Anto yawe yi majtanal ja Jesusi. Tsaʼan Jyoba yala yabʼ ja winike bʼa jun wayichal mokxa kumxuke bʼa snaj ja Herodesi, ja yuj pilan bʼej stojowe bʼa oj kʼotuke ja bʼa slugareʼi.

Ja Herodes jel tajki yajni yabʼ ja winike pilan xa bʼej stojoweta. Tixa sjeka amiljuk yibʼanal ja yal alatsik bʼa Belén masan bʼa ayiʼoje chabʼ jabʼil. Jyoba yala yabʼ ja José bʼa jun wayichal ja jasa oj skʼuluk ja Herodesi, anto ja José yiʼaj ja spamilya man Egipto. Tsaʼan, yajni José kʼot yabʼ chamta ja Herodesi, yiʼaj ja María soka Jesús sok kumxiye bʼa Nazaret. Ja Jesús tini kʼi bʼa Nazaret.

¿Machunkiluk skʼulan jel alijpuk ja kʼanal it? Ajuluk akʼujol, ja winike ti stojowe bʼajtan bʼa Jerusalén yajni yilawe ja kʼanal jel xlijpi. Satanás ja Dyablo skʼana oj smil ja Yunin ja Dyosi, sok snaʼani ja mandaranum bʼa Jerusalén, ja Herodes, ojni sleʼ modo bʼa oj smile. Ja yuj, yeʼnani ja Satanás ja maʼ skʼulan jel alijpuk ja kʼanali.