¿AKXILHPAT uma staku lu stlan lakgskgoma nema limasiyama xmakan uma chixku? Akxni taxtukgolh kJerusalén uma staku katasiyanilh. Uma lakchixkuwin minkgonitancha kʼakgtum makgat kachikin pakgan niku taxtuy Chichini chu putsananikgoy staku. Chu lakpuwankgoy pi uma staku kalima anta niku wi chatum tiku lanka xlakatsukut.

Akxni uma lakchixkuwin chankgolh chu anta tawilakgolh kJerusalén, kgalhskininankgoy: ¿Niku wi aktsu kgawasa nema xmapakgsina li Judá nawan? Li Judá na atanu xtukuwanikan li Israel. Kʼakxilhwi kstaku aktsu kgawasa anta niku taxtuyacha Chichini chu kminitaw kakninaniyaw wankgoy lakchixkuwin.

Akxni Herodes xmapakgsina Jerusalén katsilh uma, snun sitsilh. Kaj xakstu xmapakgsinanputun, nixlakaskin atanu namapakgsinan. Wa xlakata kakgalhskilh xalakpuxku sacerdotes: ¿Niku nalakachin mapakgsina nema xwankanit pi nalakachin? Xalakpuxku sacerdotes kgalhtinankgolh: KBiblia wan pi kBelén.

Wa xlakata Herodes kawanilh lakchixkuwin wantiku xminkgonitancha kʼakgtum makgat kachikin pakgan anta niku taxtuyacha Chichini: Kaputsatit aktsu kgawasa. Chu akxni natekgsatit, nakilamakatsiniyaw. Akit na kamputun kakninaniy. ¡Pero xla kaj makgniputun aktsu kgawasa!

Chu tama staku tsukulh kapulalin lakchixkuwin asta kBelén chu tachokgolh anta niku xwi aktsu kgawasa. Akxni lakchixkuwin tanukgolh kchiki, anta xwilakgolh María chu aktsu Jesús. Katuwa maskiwikgolh Jesús. Pero Jehová kawanilh lakchixkuwin kʼakgtum tamanixni pi nialh kalakgankgolh Herodes. Wa xlakata ankgolh kxkachikinkan chu tanu tiji tiyakgolh.

Akxni Herodes katsilh pi uma lakchixkuwin xʼankgonitta, snun sitsilh. Mapakgsinalh pi kakamakgnika lakgkgawasan tiku kajku xʼakgtiy kata kgalhikgoy chu tiku ni amakgatsikgoy akgtiy kata. Pero Jehová pulana makatsinilh José kʼakgtum tamanixni chu wa xlakata José kataʼalh xfamilia kʼEgipto. Titaxtulh kilhtamaku akxni José katsicha pi ay ninitta Herodes kalimpa María chu Jesús anta kNazaret. Anta unu kNazaret stakli Jesús.

¿Tiku lakpuwana wix pi tlawalh tama staku lu stlan kalakgskgolh? Kalakapastakti, akxni akxilhkgolh tama staku uma lakchixkuwin pulana ankgolh kJerusalén. Satanás Diablo xmakgniputun xKgawasa Dios chu xkatsiy pi mapakgsina Herodes xmakgniputulh. Wa litasiyay pi wa Satanás tlawalh pi tama staku lu stlan kalakgskgolh.