ЭР УЛУСТУҢ бирээзиниң айтып турары сылдысты көрүп тур сен бе? Сылдыс, олар Иерусали́мден үнүптерге, тыптып келген. Бо кижилер Чөөн чүктен чедип келген, олар сылдыстар шинчилеп турар. Бо чаа сылдыс оларны кандыг-ла бир дыка өндүр улуг кижиге чедирип башкарар деп, олар бүзүреп турар.

Иерусали́мге келгеш, олар айтырган: ‘Иуде́йлерниң хааны болур чаш төл кайыл?’ «Иуде́йлер» — дээрге изра́ильчилерниң бир өске ады. ‘Бис Чөөн чүктен чаш төлдүң сылдызын көрүп кагдывыс,— деп, ол кижилер дыңнаткан,— ынчангаш аңаа сөгүрүүр дээш келдивис’.

Ону дыңнааш, Иерусали́мниң хааны И́род дүвүреп эгелээн. Ооң орнунга өске хаан турарын ол күзевейн турар. Ынчангаш И́род бараалгакчыларны кыйгыргаш, олардан айтыртынган: ‘Аазаттынган хаан каяа төрүттүнер ужурлуг чүвел?’— ‘Библияда чугаалап турары: Вифлее́мге’,— деп, олар харыылаан.

Ынчан И́род Чөөн чүктен келген кижилерни кыйгыргаш, чагаан: ‘Барыңар, чаш төлдү дилеңер. Ону тып алзыңарза, меңээ дыңнадыр силер. Мен база баргаш, аңаа сөгүрүүрүм ол’. Ынчалза-даа херек кырында И́род чаш төлдү тыпкаш, ону өлүрер күзелдиг!

Ооң соонда сылдыс ол кижилерни Вифлее́мче эдертип эккелгеш, чаш төлдүң турган чериниң кырынга турупкан. Олар бажыңче кирип келгеш, Марияны база бичии Иисусту көрүп каан. Ынчан олар белектерин ужулгаш, Иисуска оларны сөңнээн. Ооң соонда Иегова оларның дүжүнде И́родка баарын хоруп каан. Ынчангаш олар чуртунче өске орук-биле чана берген.

И́род Чөөн чүктен улус чоруй барган деп билип кааш, килеңнеп хорадай берген. Ынчангаш Вифлее́мде шупту ийи харга чедир назылыг оолдарны өлүрер кылдыр дужаал берген. Ынчалза-даа Иегова Иосифти дүжүнде сагындырыптарга, Иосиф өг-бүлези-биле Еги́петче дезе берген. Сөөлүнде И́род өлген деп, Иосиф билип алган соонда, ол Мария база Иисус-биле Назаре́т хоорайже чанып келген. Аңаа Иисустуң чалыы чылдары эртер.

Чүү деп бодаар сен, ол чаа сылдысты кым кывыскан? Сактып кел даан, сылдысты көргеш, ол кижилер баштай Иерусали́мге барган. Нүгүлчү Эрлик Бурганның Оглун өлүрерин күзеп турган, ынчангаш Иерусали́мниң хааны И́род база ону кылырын кызыдар деп, ол билир турган. Ынчангаш Эрликтен өске, кым-даа сылдысты кывыспаан.