¿YABAL ata ta ilel te ekʼ te xlemetnax ta tilel te yak ta yakʼel ta ilel jtul winike? Te winiketik ini talemik ta banti ya xlokʼ tal te Kʼajkʼale, sok ya snaʼik yilel te ekʼetike. Te ekʼ te chiknajelto ta ilele ya skuyik te ya x-ikʼotik bael ta stojol jtul machʼa kʼax mukʼ skʼoplal.

Kʼalal kʼotik ta Jerusalén te winiketik ini, jich la sjojkʼoyik: ¿Banti ay te tut kerem te ya xkʼot ta ajwalil yuʼun te judioetike? Te kʼopil judioetik jaʼme yan biilil te yichʼoj te israeletike. Jich la yalikxan te winiketike: Kʼalalto te banti ya xlokʼ tal te Kʼajkʼale la kilkotik te ekʼ yuʼune, jaʼ yuʼun talemonkotik ta yichʼel ta mukʼ.

Kʼalal la snaʼ stojol te ajwalil yuʼun Jerusalén te Herodes sbiile, ma la smulan. Ma la skʼan teme yan ajwalil ya x-och ta sjelole. Jaʼ yuʼun jich la sjojkʼoybey te sacerdoteetik te mukʼ skʼoplalike: ¿Banti ya x-ayin te ajwalil te albil skʼoplale? Jich albot yuʼunik: Te Biblia ya yal ta Belén.

Jich yuʼun te Herodes jich la yalbey te winiketik te talemik te banti ya xlokʼ tal te Kʼajkʼale: Jojkʼoyaik ta lek te banti ay te tut kereme. Teme la ataike, albonikme kaʼiy, yuʼun yame jkʼan ya xbajtʼ kichʼ ta mukʼ euk. ¡Jaʼukmeto te binix ay ta yoʼtan-a te Herodese jaʼ te ya skʼan smil te tut kereme!

Tey-abi te ekʼ nailaj bael yuʼun ta stojol te winiketik jaʼto kʼalal ta Belén, te ekʼe la skom sba ta beel te banti ay te tut kereme. Te kʼalal ochik bael ta yutil na te winiketike, la yilik te María sok te tut kerem Jesuse, sok la yakʼbeyik smajtʼan. Ta patil la yichʼik albeyel yuʼun Jehová ta jun wayichil te manchuk ya sujtik bael ta stojol te Herodese. Jich yuʼun la stʼunik bael yan be te kʼalal sujtik bael ta slumalike.

Kʼalal te Herodes la yaʼiy stojol te sujtikix bael-a te winiketike, bayal ilin yuʼun. Jich la stikun ta milel te tut keremetik ta Belén te aytonax cheb jaʼbil yaʼbilalik sok te mato staojike. Te kʼalal mato xkʼot ta pasel ini te Jehová ay bin la yalbey ta swayich te José, jich lokʼ ta anel bajtʼ ta Egipto sok te jayeb machʼatik ay yuʼune. Te kʼalal la yaʼiy stojol te José te lajemix-a te Herodese, la schaʼyikʼ sujtel te María sok te Jesús ta Nazaret. Jaʼ tey ta Nazaret te banti chʼi te Jesuse.

¿Machʼa ya akuy-a te la yakʼ ta ilel te ekʼ te xlemetnax ta tilele? Julukme ta awoʼtan te winiketik ini, jaʼ nail bajtʼik ta Jerusalén ta yilel te ekʼe. Te Satanás te Pukuje jaʼ te machʼa yoʼtanuk kʼan smil te sNichʼan te Diose, sok snaʼoj te bitʼil te ajwalil Herodes te yoʼtanuk kʼan smil euk te Jesuse. Jich yuʼun jaʼniwan te Satanás te machʼa la yakʼ te xlemetuknax ta tilel te ekʼe.