Nganea 86: Vhanna na Ṋaledzi
Ni a i vhona iḽa ṋaledzi i penyaho ine muṅwe wa avha vhanna a khou i sumba? Ṋaledzi yo bvelela musi vha tshi ṱuwa Yerusalema. Vha bva vhubvaḓuvha, nahone vha ḓigudisa dziṋaledzi. Vha tenda uri ṋaledzi i khou vha isa kha muthu a ḓivhaleaho.
Musi vha tshi swika Yerusalema, vha vhudzisa: ‘Ṅwana ane a ḓo vha khosi ya Vhayuda u ngafhi?’ “Vhayuda” ndi ḽiṅwe dzina ḽa Vhaisiraele. Vhanna vha ri: ‘Ro thoma u vhona ṋaledzi ya ṅwana ri vhubvaḓuvha, nahone ro ḓa u mu rabela.’
Musi Herode, we a vha e khosi Yerusalema, a tshi pfa izwi a dinalea. Ho ngo ṱoḓa uri iṅwe khosi i dzhie vhudzulo hawe. Ngauralo a vhidza vhotshifhe vhahulwane a vhudzisa: ‘Khosi yo fulufhedziswaho i ḓo bebelwafhi?’ Vha fhindula: ‘Bivhili i ri Betlehema.’
Ngauralo Herode a vhidza vhanna vha Vhubvaḓuvha, a ri: ‘Tshimbilani ni yo ṱoḓa ṅwana. Ni tshi mu wana, ni mmbudze. Ndi ṱoḓa u ya nda mu rabela-vho.’ Fhedzi, vhukuma, Herode o ṱoḓa u wana ṅwana uri a mu vhulahe!
Zwenezwo ṋaledzi ya tshimbila phanḓa ha vhanna i tshi ya Betlehema, ya ima he ṅwana a vha e hone. Musi vhanna vha tshi dzhena nḓuni, vha wana Maria na Yesu muṱuku. Vha bvisa zwifhiwa vha fha Yesu. Fhedzi nga murahu Yehova a sevha vhanna nga muloro uri vha si vhuelele ha Herode. Ngauralo vha vhuelela shangoni ḽa havho nga iṅwe nḓila.
Musi Herode a tshi pfa uri vhanna vha Vhubvaḓuvha vho ya hayani, a sinyuwa zwihulu. Ngauralo a laya uri vhatukana vhoṱhe Betlehema vha miṅwaha mivhili u ya fhasi vha vhulawe. Fhedzi Yehova a sevha Yosefa zwi sa athu u itea nga muloro, nahone Yosefa a ya Egipita na muṱa wawe. Nga murahu, musi Yosefa a tshi pfa uri Herode o fa, a dzhia Maria na Yesu vha vhuelela hayani Nazareta. Afha ndi he Yesu a alutshela hone.
Ni humbula uri ndi nnyi we a ita uri ṋaledzi iḽa ntswa i penye? Humbulani, vhanna vho thoma u ya Yerusalema nga murahu ha u vhona ṋaledzi. Sathane Diabolo o ṱoḓa u vhulaha Murwa wa Mudzimu, nahone o zwi ḓivha uri Khosi Herode wa Yerusalema o vha a tshi ḓo lingedza u mu vhulaha. Ngauralo zwi a fanela uri Sathane ndi ene o itaho uri iḽa ṋaledzi i penye.
Mateo 2:1-23; Mixa 5:1.
Mbudziso
- Vhanna avha vha re kha tshifanyiso ndi vhonnyi, nahone ndi ngani muṅwe wavho a tshi khou sumba ṋaledzi i penyaho?
- Ndi ngani Khosi Herode o sinyuwa, nahone o ita mini?
- Ṋaledzi i penyaho yo livhisa ngafhi vhenevho vhanna, fhedzi ndi ngani vho humela shangoni ḽavho nga iṅwe nḓila?
- Ndi ndaela ifhio ye Herode a i ṋea, nahone ndi ngani?
- Yehova o vhudza Yosefa uri a ite mini?
- Ndi nnyi we a ita uri ṋaledzi ntswa i penye, nahone ndi ngani?
Mbudziso yo engedzeaho
- Vhalani Mateo 2:1-23.
Yesu o vha e na miṅwaha mingana nahone o vha a tshi khou dzula ngafhi musi vhaḓivhi vha ṋaledzi vha tshi mu dalela? (Mat. 2:1, 11, 16)
