ANA akujiwona ndondwa jakuŵala mnopejo jakujilanjila acalumewo? Paŵanyakwice ku Yelusalemu, ndondwaji jawonecele. Acalumeŵa ali ŵa Kungopoka Lyuŵa, soni akusalijiganya ya ndondwa. Akukulupilila kuti ndondwa jasambanoji jikwalongola kwa jwine jwakwe jwakusosekwa mnope.

Acalumeŵa pakopocele ku Yelusalemu, akuwusya kuti: ‘Mwanace jucaciŵa mwenye jwa Ayuda ali kwapi?’ “Ayuda” lili lina line lya Ayisalayeli. Acalumeŵa akuŵeceta kuti: ‘Twajiweni ndondwa ja mwanacejo patwaliji Kungopoko lyuŵa, m’yoyo tuyice kuti tumlambile.’

Helode jwali mwenye ku Yelusalemu, paŵapikene yeleyi ŵatumbile. Jwalakwe nganasakaga kuti mwenye jwine cajigale ulamusi wakwe. M’yoyo Helode ŵaŵilasile acakulungwa ŵambopesi nikwawusya kuti: ‘Ana mwenye jwa cilangano jula cacipagwila kwapi?’ Jemanjajo akwanga kuti: ‘Baibulo jikusala kuti ku Betelehemu.’

M’yoyo Helode ŵaŵilasile acalume ŵa Kungopoka lyuŵa ŵala, nikwasalila kuti: ‘Ajawule akawungunyewungunye ya mwanacejo. Naga akumsimana asalile. Nombene ngusaka njawule kukumlambila.’ Nambo, kusyesyene, Helode ŵasakaga kuti ammanye mwanacejo kuti am’wulaje!

Kaneko ndondwa jila jikwalongola acalume ŵala ku Betelehemu, kaneko jikwima pamalo paŵaliji mwanace jula. Acalume ŵala pakwinjila m’nyumba, akumsimana Maliya ni mwanacejo, Yesu. Akukoposya mituka jawo nikujipeleka kwa Yesu. Kaneko Yehofa akwakalamusya acalume ŵala kupitila mu sagamisi kuti akajawulasoni kwa Helode. M’yoyo acalumeŵa akuwujila ku cilambo cawo kupitila litala line.

Helode papikene kuti acalume ŵa Kungopoka Lyuŵa ŵala awujile kumangwawo, jwalakwe akutumbila mnope. Sambano akulamula kuti ŵanace wosope ŵacalume ŵa m’Betelehemu ŵa yaka yiŵili kwawula pasi awulajigwe. Nambo Yehofa akumkalamusya Yusufu kupitila mu sagamisi mkanipaŵe, m’yoyo Yusufu ni liŵasa lyakwe akusamila ku Eguputo. Kaneko, Yusufu papikene kuti Helode awile, akuwujila najo Maliya ni Yesu ku Nasaleti. Ni Yesu akukulila ku Nasaletiku.

Ana akuganisya kuti nduni juŵajitendekasisye ndondwa jasambano jila kuti jiŵale? Akumbucile kuti acalume ŵala candanda ŵapite ku Yelusalemu paŵajiweni ndondwa jila. Satana ŵasakaga kum’wulaga Mwanace jwa Mlungu, soni ŵayimanyi kuti Mwenye Helode jwa ku Yelusalemu cacilingalinga kuti am’wulaje. M’yoyo Satana ni juŵatendekasisye kuti ndondwa jila jiŵale.