Ododo 87

Latin Yecu i Ot pa Lubanga

NEN latin awobi ma tye ka lok ki ludito-ni. Gin aye lupwonye i ot pa Lubanga ma i Jerucalem. Dok awobi-ni aye Yecu. En dong odongo woko manok. Kombeddi dong en tye ki mwaka 12.

Lupwonye-ni guuro mada ni Yecu tye ki ngec madwong i kom Lubanga kacel ki jami ma kicoyo i Baibul. Ento pingoYucepu gin ki Maliam pe gitye kany? Gin gitye kwene? Kong wanenu.

Mwaka ducu Yucepu tero jo ode Jerucalem pi kwer mo ma pire tek ma kilwongo ni Kato. Bedo wot mabor adada me a ki Najaret me cito Jerucalem. Ngat mo pe ki motoka, kadi wa gaa bene pe. Gin onongo gipe ki jami magi i kare ca. Pol dano giwoto ki tyen, dok terogi cokcok nino adek me o Jerucalem.

Kombeddi jo ot pa Yucepu dong tye mapol. Pi meno tye omegi kacel ki lumegi Yecu mogo matino ma omyero kigwokgi. Dong, i mwaka-ni Yucepu gin ki Maliam gumako wot mabor-ri ki lutinogi me dok cen paco Najaret. Gin gitamo ni Yecu tye ka wot ki jo mukene. Ento i kare ma gugiko wot me nino meno, gin pe gumedo ki nongo Yecu. Guyenye i kin wadigi ki luremgi, ento en peke botgi! Pi meno gin gudok wa Jerucalem ka yenye kunnu.

Olo twal gunongo Yecu kany kacel ki lupwonye. En tye ka winyo lokgi kacel ki penyo peny. Dok dano ducu onongo giuro kit ma Yecu ryek kwede. Ento Maliam owaco ni: ‘Latin, pingo itimo man botwa? An wan ki woru wabedo ki par madit me temme me nongi.’

Yecu ogamo ni: ‘Pingo wubedo ka yenya? Onongo pe wungeyo ni omyero abed i ot pa Wora?’

Ada, Yecu maro bedo ka ma en twero ngeyo iye lok i kom Lubanga. Meno aye pe kit cwiny ma wan bene myero wabed kwede? Ki i pacone Najaret, Yecu cito i cokke me woro i cabit ducu. Pien en kare ducu keto cwinye, en ongeyo lok mapol ki i Baibul. Wabedu dong calo Yecu kun walubu lalen ma mege.

Luka 2:41-52; Matayo 13:53-56.