HYƐ jokuɛ nyumuyo ɔ nɛ e kɛ nikɔtɔma amɛ ngɛ munyu tue ngɛ foni ɔ mi ɔ. Nikɔtɔma amɛ ji tsɔɔli ngɛ Mawu sɔlemi we nɛ ngɛ Yerusalem ɔ. Nɛ jokuɛ nyumuyo ɔ ji Yesu. E wa bɔɔ jehanɛ ɔ. Amlɔ nɛ ɔ, e ye jeha 12.

Tsɔɔli ɔmɛ a nya kpɛ a he kaa Yesu le Mawu kɛ níhi nɛ́ a ngma ngɛ Baiblo ɔ mi ɔ he ní fuu. Se mɛni heje nɛ Yosef kɛ Maria lɛɛ a be hiɛ ɔ? Jije a ngɛ? Ha nɛ waa hyɛ.

Daa jeha a, Yosef ngɔɔ e weku ɔ kɛ baa Yerusalem nɛ a ba yeɔ gbijlɔ pɔtɛɛ nɛ a tsɛɛ ke Hetsɔmi ɔ. Kɛ je Nazaret kɛ ya Yerusalem ji blɔ gagaa. Lɔle be, nɛ tlee hu be. Ní nɛ ɔmɛ be ngɛ jamɛ a be ɔ mi. Lɔɔ he ɔ, nihi fuu nyɛɛɔ, nɛ a yeɔ ligbi etɛ loko a ya suu Yerusalem.

Amlɔ nɛ ɔ, Yosef weku ɔ kle. Lɔɔ he ɔ, Yesu nyɛminyumuhi kɛ nyɛmiyihi wawi komɛ ngɛ nɛ e sa kaa a hyɛ mɛ. Lɔɔ he ɔ, jeha nɛ ɔ, Yosef kɛ Maria kɛ a bimɛ ɔmɛ hia blɔ gagaa a kɛ kpale kɛ yaa Nazaret. A susu kaa Yesu piɛɛ blɔ hiali kpa amɛ a he. Se benɛ je jɔ nɛ a ya to si ngɛ blɔ ɔ nɔ he ko ɔ, a nɛ́ Yesu. A hla lɛ ngɛ a wekuli kɛ a huɛmɛ a kpɛti se a nɛ́ lɛ! Lɔɔ he ɔ, a kpale kɛ ho Yerusalem ya konɛ a ya hla lɛ ngɛ lejɛ ɔ.

Nyagbe ɔ, a ba na Yesu ngɛ tsɔɔli ɔmɛ a ngɔ ngɛ sɔlemi we ɔ. E ngɛ mɛ tue bue nɛ e ngɛ mɛ sanehi bie. Ni ɔmɛ tsuo a he mi po ngɛ ní lemi nɛ Yesu ngɛ ɔ heje. Maria de Yesu ke: ‘Ye bi, mɛni heje o pee wɔ kikɛ? I kɛ o tsɛ kpa si kɛ hla mo hluu.’

Yesu ha heto ke: ‘Mɛni heje e sa kaa nyɛ hla mi? Anɛ nyɛ li kaa e sa nɛ́ ma hi ye Tsɛ we ɔ mi lo?’

Ee, Yesu suɔ kaa e maa hi he nɛ e ma nyɛ maa kase Mawu he ní ngɛ. Anɛ pi ja nɛ e sa kaa wɔ hu waa pee wa ní lo? Benɛ a ngɛ Nazaret ɔ, Yesu yaa kpe tsuaa kpe nɛ a peeɔ kɛ ha jami daa otsi. Akɛnɛ e buɔ tue saminya heje ɔ, e kase ní fuu kɛ je Baiblo ɔ mi. E sa nɛ waa pee wa ní kaa Yesu.