TALA kanuke au wa lunga kanahanjika ni malunga awa a makulwana. Ayo kali alongeshi a mu tembele ya Zambi ku Yerusaleme. Nawa kanuke au kali Yesu. Iye hakola ndambu. Haliapwila iye kali ni miaka 12.

Alongeshi yakomoka chinji ha kumona Yesu kali ni malinjekela anji hakutwala kuli Zambi ni ha yisoneko ya mu Mbimbiliya. Mba mumu liaka Yosefwe ni Maria keshi hamuwika ni iye? Kuli mba ayo jili? Tutalenu.

Ha miaka yeswe Yosefwe te kakuyaya ni asoko jenyi ku Yerusaleme ha chimwe chiwanyino chize anavuluka ngwo Chizomboka. Te kakulinga umwe wenyi usuku kukatuka ku Nazare ndo ku Yerusaleme. Niumwe te ukwete mashinyi chipwe komboiu wakwihi. Mumu ha matangwa jacho yuma yacho te kuyatwamineko. Atu anji te kakwendela hashi, nawa te kakulinga matangwa atatu mba maheta ku Yerusaleme.

Yosefwe te kakwete asoko anji. Kashika iye te ndo akwase ana a malunga ni ana a mapwo waze te achili chinji twanuke kuhianyisa Yesu. Mba, ha mwaka wacho Yosefwe ni Maria yalinga wenyi yijifuna ku zuwo mu Nazare. Ayo yanyonga ngwo Yesu kali hamuwika ni akwa wenyi akwo. Alioze muze te hikwapwa chingoloshi ayo yamana, hi kamwene Yesu. Ayo yamufupa mukachi ka asoko ni masepa, nihindu kamumwene! Hohene ayo yafuna ku Yerusaleme hanga amufupileko.

Ayo yawana Yesu mukachi ka alongeshi. Iye te kanaapanjika nawa te kanaalingi yihula. Atu eswe waze te anamupanjika yakomoka chinji ha malinjekela waze te Yesu ali no. Mba Maria yamba ngwenyi: ‘Mwanami, kuchi yena walinga chuma chino kuli yetwe? Tatenu ni yami te tunalihulumba chinji ni kukufupa.’

Yesu yakumbulula kuli ayo ngwenyi: ‘Mumu liaka yenwe te nunangufupu? Yenwe te kunwanyingikine ngwo yami changutamba kupwa mu zuwo lia Tata, nyi?’

Ewa, Yesu te kakuzanga kutwama haze te iye mahasa kulilongesa hakutwala kuli Zambi. Ni yetwe nawa chatutamba kukaula chilweza chenyi, nyi ngwami? Muze hafuna ku Nazare, nihindu Yesu te kakuya mu yikungululo ni kuwayila ha pwoso jeswe. Iye te kakupanjika kanawa, kashika alilongesele yuma yinji ya mu Mbimbiliya. Ni yetwe tupwenu ngwe Yesu, nawa tukaulenu chilweza chenyi.