NGAKCHIAPA he bia aa ruah mi upa hna hi zoh hmanh u. Jerusalem i Pathian biakinn ah cawnpiaktu an si. Cun ngakchiapa cu Jesuh a si. Tlawmpal a hung upa deuh ve cang. Atu cu kum 12 a si cang.

Cawnpiaktu hna cu Jesuh nih Pathian le Baibal i aa ṭial mi thil kong cutluk in a hngalh cu an khuaruah a har ngaingai. Sihmanhsehlaw zeicah Josef le Mari cu hika ah hin an um ve lo? Annih cu khuazei ah dah an um? Zoh tuah u sih.

Kum fate Josef nih a chungkhar hna cu a bik in tuah mi lanhtak puai ah Jerusalem ah a kalpi tawn hna. Nazareth in Jerusalem lei kal awk cu a hla ngai mi khuallam a si. Ahohmanh mawtaw an ngei lo i, tlanglawng zong a um fawn lo. Cu lio ahcun hi hna cu an rak ngei rih hna lo. Mi tam deuh cu an ke in an kal i, Jerusalem phanh awk ah ni thum hrawng an rau.

Hi caan lio ah hin cun Josef cu a innchungkhar mi an tam pah ve cang. Cucaah zohkhenh awk ah Jesuh a naule le a farle zong an um cang. Josef le Mari cu an fale hna he Nazareth lei ah an kir cang. Annih nih Jesuh cu midang hna he hmai ah a kal cang rua tiah an ruah. Sihmanhsehlaw ni khat chung an kal i kan riak cang lai an ti tik ah, Jesuh cu an hmu ti lo. An rualchan hna le an hawile sin ah amah cu an kawl nain an hmu ti lo! Cucaah amah kawl awk ah Jerusalem ah an hung kir ṭhan.

Hmanung bik ah Jesuh cu hika ah hin cawnpiaktu hna he an hmuh. An bia kha ṭha tein a ngaih i bia zong tampi a hal hna. Jesuh a fimzia an hmuh tik ah mi vialte cu an khuaruah a har. Sihmanhsehlaw Mari nih: ‘Ka fa, zeicahdah hi bantuk in na kan tuah? Na pa le keimah cu kan awlok chawng lengmang in pei kan in kawl cu,’ tiah a ti. ‘Zeicah nan ka kawl? Ka Pa inn chung ah ka um awk a si ti nan hngal lo maw?’ tiah Jesuh nih a leh.

A si, Jesuh cu Pathian kong a hngalh khawh nak ding hmun ah um a duh. Kannih zong cu bantuk cun kan ruah ve awk a si lo mei? Nazareth khua i an um tik zong ah, Jesuh cu zarh fate biaknak ca i pumhnak ah a kal zung zal lai. Ṭha tein a ngaih zungzal caah Baibal tampi a hngalh. Kannih zong Jesuh bantuk si ve u sih law a keneh cu zul ko u sih.