SESE ekpri eyeneren etịn̄de ikọ ọnọ ikpọ owo emi. Mmọ ẹdi mme andikpep ke temple Jerusalem. Ndien eyeneren oro edi Jesus. Enye ọkọri okpon esịt. Ke emi enye edi isua 12 ke emana.

Mme andikpep ẹdu ke n̄kpaidem nte Jesus ọfiọk ekese ntre aban̄a Abasi ye mme n̄kpọ emi ewetde ke Bible. Edi ntak Joseph ye Mary midụhe mi n̄ko? Mmọ ẹdu mmọn̄? Yak idụn̄ọde ifiọk.

Kpukpru isua, Joseph ada ufọk esie edi Jerusalem ke akpan usọrọ ẹkotde Passover. Edi anyan usụn̄ ndito Nazʹa·reth ndi Jerusalem. Baba owo inyeneke moto, n̄ko mme train idụhe. Owo ikenyeneke mmọ ke mme usen oro. Ekese owo ẹsasan̄a, ndien ada mmọ n̄kpọ nte usen ita ndisịm Jerusalem.

Ke ini emi, Joseph enyene akamba ubon. Ntre n̄kpri nditọ eka Jesus iren ye iban ẹdu ndise mban̄a. Ọfọn, isua emi, Joseph ye Mary ẹnyọn̄ ye nditọ mmọ ke anyan isan̄ ndifiak ke Nazʹa·reth. Mmọ ẹkere ke Jesus odu ye mbon eken ke usụn̄ isan̄. Edi ke mmọ ẹbetde ke utịt usen oro, mmọ ikwe Jesus. Mmọ ẹyom enye ke otu mme iman ye mme ufan mmọ, edi enye idụhe ye mmọ! Ntre mmọ ẹfiak ẹnyọn̄ Jerusalem ndiyom enye do.

Ke akpatre, mmọ ẹkụt Jesus mi ye mme andikpep. Enye ke akpan̄ utọn̄ ọnọ mmọ ke onyụn̄ obụp mme mbụme. Ndien kpukpru owo ẹdu ke n̄kpaidem nte Jesus ọfiọkde n̄kpọ. Edi Mary ete: ‘Eyen, nsinam afo anamde nnyịn ntem? Ami ye ete fo ke itịmede esịt iyom fi.’

Jesus ọbọrọ, ‘Nsinam mbufo ẹyomde mi?’ ‘Nte mbufo ifiọkke ite nnyene ndidu ke ufọk Ete mi?’

Ih, Jesus ama ndidu ke ebiet enye ekemede ndikpep mban̄a Abasi. Nte oro idịge usụn̄ nnyịn ikpekerede n̄ko? Ko ke ufọk ke Nazʹa·reth, Jesus eyeka mme mbono utuak ibuot kpukpru urua. Koro enye esikpan̄de utọn̄ kpukpru ini, enye ama ekpep ediwak n̄kpọ oto Bible. Yak ibiet Jesus inyụn̄ itiene uwụtn̄kpọ esie.