Kukwe kira 87

Jesús monsore templo te

MONSO chi tä blite nitre umbre ben mike ñärärä. Niaratre ye dirikä templo Ngöbökwe Jerusalén te. Monso chi ye Jesús. Niara ririabarera bäri. Aune kä niena 12 niarabiti.

Jesús ie Ngöbö aune kukwe Bibliabätä gare krubäte, yebätä nitre dirikä töi namani ñan krütare. Akwa, ¿ñobätä José bätä María ñaka nete? ¿Niaratre tä medente? Ani mike gare jai.

Kä kwatire kwatire te José nämene kite mräkätre ngwena, bieta ütiäte kädekata Paskwa mikakäre täte. Mente krubäte Nazaret nemen Jerusalén. Kä ye ngwane karo bätä tren ñaka nämene jire nitrekwe. Nitre jökrä bäsi nämene näin gürere, aune köbömä te nämenentre näin nemen Jerusalén.

Ye ngwane José mräkätre namanina kwati krubäte. Yebätä nämene Jesús etebatre bätä ngwaitre bäri bati ye ngübare. Kä ye näire José bätä María nikaninta monsoitre yebe Nazaret. Jesús nämene näin nitre madabe namani ruin ietre. Akwa niaratre namani nünentubu ye ngwane, ñaka kwani ietre. ¡Namani känene mräkätre bätä ja ketamuko kwe ye ngätäite, akwa ñaka kwani ietre! Yebätä nikaninta Jerusalén känänkäre.

Mrä kwani nete ietre. Niara tä nitre dirikä ye kukwe nuin aune tä kukwe ngwentari ietre. Niara töbätä krubäte yebätä nitre jökrä töi namani ñan krütare. Akwa María niebare: ‘Monso tikwe, ¿ñobätä mä kukwe ne nunien nunbätä? Mä rün bätä ti nunta mä känene töbikare kwärä.’

‘¿Ñobätä munta ti känene?’ Jesús niebare. ‘¿Ti tädre ti Rün gwirete ye ñan gare muen?’

Jän, Jesús nämene ja tötike Ngöböbätä yekänti tö nämene näin. Ye erere nikwe nuaindre, ¿ñan ererea? Nazaret yekänti, Jesús nämene niken gätäbätä bämän kratire kratire Ngöbö mikakäre täte. Niara nämene käre nitre kukwe nuin, yebätä kukwe keta kabre Bibliabätä namani gare ie. Jesús ye erere nikwe ja ngwandre.

Lucas 2:41-52; Mateo 13:53-56.