Omuatje Jesus mondembeli
EHUNGI 87
Omuatje Jesus mondembeli
TARA kokazandu ngo ku make hungire novarumendu ovanene mbo. Owo ovahonge womondembeli mu Jerusem. Nu okazandu oJesus. Eye we kura kaṱiṱi. Imbo wa ri nozombura 12.
Ovahonge va himinwe tjinene mena rokutja Jesus aa tjiwa oviṋa ovingi ohunga na Mukuru noviṋa mbya tjangerwe mOmbeibela. Nungwari omena ratjike Josef na Maria tji ve he ri mba wina? Owo va ri pi? Indjeye tu konḓonone.
Ombura aihe Josef aa eta eṱunḓu re arihe ku Jerusalem komukandi wapeke mbu isanewa oPaska. Ya ri ouyenda oure okuza ku Nasaret okuyenda ku Jerusalem. Kape nomundu ngwa ri notjihauto nu kakwa ri ozomahina momayuva ngo. Ovandu ovengi aave kayenda pehi, nu aape kambura omayuva ngambeno yetatu okuvaza ku Jerusalem.
Oruveze ndo Josef wa ri neṱunḓu enene. Okutja pa ri ovangu vaJesus, ovazandu novakazona okuṱakamisa. Ombura ndjo Josef na Maria novanatje vawo va toora ouyenda oure okuyaruka konganda ku Nasaret. Owo aave ripura kutja Jesus u ri mouyenda pu novakwawo. Nungwari owo komaandero weyuva tji va kakurama, owo kaave munu Jesus. Owo ve mu paha mokati kovazamumwe vawo nomapanga, nungwari eye ka ri puna wo! Okutja owo va yaruka ku Jerusalem okukemupaha.
Korusenina va kavaza Jesus imba pu novahonge. Eye aa puratene kuwo nokuvepura omapuriro. Nu ovandu ovengi va himinwe mena rounongo Jesus mbwa ri nawo. Nungwari Maria arire tja tja: ‘Muatje wandje, okutjavi ove tji we tu tjiti nai? Ami na iho twe ku paha tjinene nozongama.’
Jesus wa pura na tja: ‘Eṋe mamu ndji pahere tjike? Kamu nakutjiwa kutja ami mbi sokukara mondjuwo yaTate are?’
Tjiri, Jesus wa suverere okukara imba pu me rihongo ohunga na Mukuru. Eṱe wina twa sokukara noumune otjingewo, katjiperi? Konganda ku Nasaret, Jesus aai kozombongarero zomerikotameno otjivike atjihe. Mena rokutja eye aruhe aa yandja ombango, eye ee rihongo oviṋa ovingi okuza mOmbeibela. Ngatu kare tjimuna Jesus nu tu kongorere otjihorera tje.
