AKITALA iwe mwanyike pa kipikichala byo esambilenga na bano bakulumpe. Bajinga bafunjishi ba mu nzubo ya Lesa mu Yelusalema. Uno mwanyike wajinga Yesu. Wakomeneko pacheche. Pano wafikizhe myaka ya kusemwa 12.

Bafunjishi bakuminye bingi pa kumona’mba Yesu wayukile byavula pe Lesa ne bintu byanembwa mu Baibolo. Pano mambo ka ba Yosefwa ne Maliya o babujijile kutanwapo? Abya bajinga kwepi? Twaya tumone.

Pa mwaka pa mwaka, Yosefwa waletanga kisemi kyanji ku Yelusalema na kusekelela kijiilo kya Lupitailo. Palepele bingi kufuma ku Nazala kwiya ku Yelusalema. Kafwako wajinga na motoka ne, kabiji kechi kwajingapo mashitima ne. Mu oa moba kechi kwajinga bino bintu ne. Bantu bavula baendangatu, kabiji papitanga moba asatu pa kubatu’mba bafike ku Yelusalema.

Pa kino kimye Yosefwa wajinga na kisemi kyabaya. Onkao mambo, kwajinga ne bankasanji Yesu babalume ne babakazhi bafwainwe kutewa muchima. Awo mwaka, Yosefwa ne Maliya baimene lwendo lwabo lwalepa pamo na baana babo lwa kubwela kwabo ku Nazala. Balangulukile’mba Yesu naye uji pamo na bakwabo. Pano byo baimene panyuma ya kwenda lwendo lwa juba jimo, Yesu kechi bamumwene ne. Batendekele kumukeba mu balongo babo ne balunda nabo, ne kumumonatu ne! Onkao mambo, babwelele jibiji ku Yelusalema na kumukeba.

Byo bafikile kokwa, bamutaine mu nzubo ya Lesa pamo na bafunjishi. Waumvwinenga byaambilenga bafunjishi ne kwibepuzha mepuzho. Kabiji bantu bonse bakuminye bingi maana ajinga na Yesu. Bino Maliya waambile’mba: ‘Mwanami, mambo ka o witubila kino kintu? Bashobe ne amiwa twaji kwakamwa bingi, kyo tubena kukukebela.’

Yesu wibakumbwile’mba: ‘Mwajikunsakilanga ka? Nanchi kechi mwajikuyuka’mba, nafwainwa kwikala mu nzubo ya Batata nenyi?’

Ee, Yesu watemenwe bingi kwikala ko akonsheshe kufunda pe Lesa. Nanchi ne atweba kechi byo byo twafwainwa kubanga nenyi? Byo babwelele ku muzhi kwabo ku Nazala, Yesu wayanga ku kipwilo na kupopwela Lesa mulungu ne mulungu. Na mambo a kuba watangako muchima, wafunjile bintu byavula bingi mu Baibolo. Twaya twikale byonka byajinga Yesu ne kulondela kya kumwenako kyanji.