Esimwititi 87: Munona Jesus montembeli
TARA kamati aka kana kuuyunga novagara wovakurona ava. Awo kuna kara varongi montembeli zaKarunga moJerusarema. Ano kamati kuna kara Jesus. Age ana kuru ko. Ngesi ana kara nomvhura 12.
Varongi tava tetuka unene kweyi ga diva Jesus yoyinzi yokuhamena Karunga ntani yininke eyi va tjanga moBibeli. Nye morwasinke oJosefa naMariya vana dilire kukara po nawo? Kupi oku vana kara? Tu tareni.
Nkenye mvhura Josefa nga reta epata lyendi koJerusarema kosipito sokulikarera ngava tumbura asi Paska. Rugendo rokutunda koNasareta o ze koJerusarema rure. Kwato ogu ga kara netuwa, ntani kwato mahina. Momazuva gena kapi va kere nayo. Sinzi sovantu ngava gendi, ano ngayi va gusa mazuva gatatu ntani vana ku ka sika koJerusarema.
Apa ngesi Josefa age ana kara nepata lyenene. Pana kara vamumbya vaJesus wovakadona nava wovamati ava va hepere kuvakunga. Mvhura ezi oJosefa naMariya kwa katukire novana vawo morugendo rorure rokutengura kembo koNasareta. Awo kuna kugazara asi Jesus kweli kovakwawo morugendo. Nye apa va ka sikeme kouhura wezuva, Jesus nokumugwana si. Tava mu papara movanekoro novakaume, nye age kapi ana kara nawo! Makura tava tengura koJerusarema va ka mu papare.
Mouhura tava ya gwana Jesus novarongi. Age ta va purakene oku ta va puragere. Ano vantu navenye vana tetuka nondunge daJesus. Nye Mariya ta tanta asi: ‘Munwange, yinke ono tu ruganene ngesi? Oguhwo name kuna ku papara nompwagetjima.’
Jesus ta limburura asi: ‘Yinke eyi muna paparere nge? Kapi mwa diva asi na kona kukara monzugo zaTate?’
Yimo, Jesus kwa hara kukara oku na lironga kuhamena Karunga. Nani ngesi kapisi yimo natu lizuvha nose? Kwina kembo moNasareta, Jesus nga zi komapongo gokukatongamena nkenye sivike. Age kwa lirongere yininke yoyinzi yokutunda moBibeli, morwa nkenye apa nga purakene. Tu kareni ngwendi Jesus nokukwama sihonena sendi.
Rukasa 2:41-52; Mateusa 13:53-56.
Mapuro
- Mefano nomvhura daJesus dingapi da kara, ntani kupi ana kara?
- Yinke a rugana Josefa kumwe nepata lyendi nkenye mvhura?
- Konyima zezuva limwe rorugendo rokutengura kembo, morwasinke vana tengwilire oJosefa naMariya koJerusarema?
- Kupi oku vana gwana oJosefa naMariya Jesus, ntani morwasinke vantu oko vana tetukire?
- Yinke ana kutantera Jesus ozina, Mariya?
- Ngapi omu natu vhura kukara ngwendi Jesus mokulironga kuhamena Karunga?
Mapuro gokugwederera ko
- Resa Rukasa 2:41-52.
Nampili ngomu Veta kwa hepere asi vagara velike wokukara mosipito somomvhura, sihonena musinke sosiwa va gava oJosefa naMariya kovakurona naina?
Ngapi omu ga tura po Jesus sihonena sosiwa kovadinkantu naina mokukara noulimburukwi kovakurona vawo?
- Resa Mateusa 13:53-56.
Vamumbya vane vaJesus musinke va tumbura mo moBibeli, ntani ngapi omu vavali vamo konyima va ya va ruganesere mombungakriste?
