TALA nleke ndioyo omokenanga ye mbuta za wantu. Yau, alongi muna tempelo a Nzambi muna Yerusaleme. O nleke i Yesu. Okudidi, owau mvu 12 se kena.

Alongi basivikidi kikilu kadi o Yesu ozeye mayingi mu kuma kia Nzambi ye mana masonama muna Nkand’a Nzambi. Kansi, ekuma Yosefe ye Maria ke benena vo ko? Akweyi bena? Yambula twawa.

O Yosefe wanatanga esi nzo andi kuna Yerusaleme mvu miawonso, kun’elambu diamfunu diayikilwanga vo Nduta. Nkangalu anda wakala tuka Nazarete yakuna Yerusaleme. Muna lumbu yayina ke vakala muntu ko wakala ye kalu ke vakala mpe kumbi dia ntoto ko. Wantu kiamalu badiatilanga. Lumbu tatu bakangalanga muna lwaka kuna Yerusaleme.

Owau Yosefe una ye wan’ayingi. Bafwana lunga-lunga mpangi zamakento ye zamakala za Yesu. O mvu wau, elambu dia Nduta vava diafokoka, o Yosefe yo Maria bavutukidi yo wan’au kuna Nazarete. Babanza vo Yesu una muna buka kia akangadi akaka. Kansi, vava bavunda mu fuku, ke bamwene Yesu ko. Bamvavidi vana vena yitu yau y’ana bazayanene, ke bansolwele ko. Bavutukidi kuna Yerusaleme, bele amvavi.

I bosi, bansolwele muna tempelo, ovwende vana ven’alongi. Okubawunikinanga yo kubayuvula yuvu. Awonso basivikidi muna zayi wandi. Kansi, o Maria ovovele vo: ‘E mwana, adieyi utuvangìdi wau? o s’aku yo mono tukwenda avavinge ye ntantu.’

O Yesu ubavovese vo: “Adieyi numpavìdi? ke nuzeye wo ko vo omu nzo Es’ame i mfwete kal’e?”

Elo, o Yesu wazolang’o kala va fulu kalenda longokela oma ma Nzambi. Nga ke wau ko mpe tufwete kala oyeto? Vava kavutuka kuna Nazarete, konso lumingu o Yesu wayendanga kuna lukutakanu mu sambila Nzambi. Wau vo, watoma wunikinanga, walongoka mambu mayingi ma Nkand’a Nzambi. Yambula twakala nze Yesu yo tanginina mbandu andi.