KEʼYINKA aju qʼa nyolin kyukʼe qe tij xjal. Aqeju tij xjal lu xnaqʼtzalqe tuj tja Dios atz Jerusalén. Atzunjo qʼa at kyukʼil atzun Jesúsju. Ma chʼiy nim. Iqʼintl 12 abʼqʼi tuʼn jaʼle.

Bʼiʼx naj kynabʼil (naq e jaw kaʼylaj) aj xnaqʼtzal tiʼj Jesús tuʼnjo attoq nim tnabʼil tiʼj Dios ex tiʼjjo tzʼibʼinkux toj Tuʼjil Tyol. ¿Tiquʼn mitiʼ at José ex María tukʼil Jesús? ¿Jatumel ateʼqe? Kʼelel qnikʼ tiʼj.

Tuj tkyaqil abʼqʼi, in che pon tiʼntaq José kykyaqil toj tja atz Jerusalén tuʼn tkubʼ kyikʼsaʼn aju Xjan Qʼij. Najchaq (laqʼche) taʼ Jerusalén tiʼj Nazaret. Mitiʼqetoq karro ex mitiʼqeteq tren tuj ambʼil aju. Chʼixme kykyaqil xjal in che bʼettaq tuʼn kyqan, ex chʼimilo oxe qʼij nxi tiʼntoq tuʼn kypon tuj Jerusalén.

Oteq chmet nim kybʼet José toj kyja. Quʼn atqeʼtoq titzʼin Jesús iltaq tiʼj tuʼn kyok t-xqʼuqin José. Tuj abʼqʼi lu, tej kymeltzʼaj José tukʼe María ex qe kykʼwaʼl toj Nazaret, kubʼ kyximin qa tokxteq Jesús kyxol qejo xjal in che bʼettoq. Tejtzun kykubʼ ten ajlal tej tex qʼij, mitiʼ kanet Jesús kyuʼn. ¡E ok ten jyolte kyxol qeju at kyxilen kyukʼil ex kyxol kyamiw, pero mitiʼ knet kyuʼn! E meltzʼaj juntl maj jyolte Jesús atz Jerusalén.

Atz kanet Jesús kyuʼn tzalu. In bʼinteq kyiʼj aj xnaqʼtzal ex nxitaq tqanin xjel kye. Bʼiʼx naj kynabʼl xjal tej tok kybʼiʼn tnabʼil Jesús. Xitzun tmaʼn María te: ‹Wal, ¿tiquʼn ma tbʼinchaya jlu qiʼje? Lu tmana ex lu qine in qo jyone tiʼja ex nim in qo bʼisune›.

Xitzun tmaʼn Jesús kye: ‹¿Tiquʼn in che jyone wiʼje? ¿Maj mintiʼ bʼiʼn kyuʼne qa ilxix tiʼj tuʼn ntene tuj tja nMane?›

Tbʼanel ela tuj twitz Jesús tuʼn tten jatumel jakutaq tzʼel mastl tnikʼ tiʼj qMan Dios. Ax ikx qe iltiʼj tuʼn qok ik tzaʼn te Jesús. Tej attoq Jesús toj Nazaret, nxiʼteq kyoj chmabʼil tkyaqil seman atz jatumel in jaw nimset Dios. Tuʼnjo in bʼintoq kyoj chmabʼil, el tnikʼ tiʼj nim tiʼchaq aju tkuʼx tuj Tuʼjil Tyol Dios. Qo lepeʼk tiʼj techel kyaj tqʼoʼn Jesús.