CHÓTSENLALAI je ti xi tífakaosí chjota jchínga xokjoan. Kjoatéxomale Niná bakóya chjota xokjoan ya yo̱ngo̱ Jerusalén. Kʼoa je ti xosíkji jení Jesús. Je koanjchínga. Kʼoa je tejao nóle ibi.

Je chjota xi bakóya kjoatéxoma tokʼoakjimale nga kʼoasikji be Jesús xi tʼatsʼe Niná kʼoa xi faʼaitʼa Biblia. Tonga, ánni nga tsín i̱ tjíokaosíni je José kao María. Jñáni tjío. Kataʼyala.

Nga xki̱nó ya fikao ngatsʼi yaniʼyale José je sʼuíje xi sʼejna Jerusalén xi sʼuí Paxko ʼmi. Nkjín nichxin bichóni Jerusalén saʼnda nga bitjoni Nazaret. A liʼya xi carro kisʼele kʼoa tsínje̱ xi avión ʼmi nga kui nichxin. Me to ndsoko tsakʼetsomani ngatsʼi chjota, kʼoa janla nichxin tsakʼéngi ngatsʼi nga kichó Jerusalén.

Nga kʼia je nkjínya mani yaniʼyale José. Kʼoa je jinla kisisinle je xtiʼndíndsʼe kao xtiʼndíndichja Jesús. Kʼianga kui nó jebi nga je jetʼa sʼuí ijngokʼa kʼoasʼin kini José kao María kʼoa kao xtile ya Nazaret. Yajin tjenjinle Jesús je chjota xi ngikʼa kitsojin. Tonga kʼianga je tsakatiokjáya nga je koanjnjio, tsín je Jesús. ¡Kiskonangile xínkjín kʼoa kao miyole, tonga likui koansjaile! Ijngokʼa kini Jerusalén nga kikásjai.

Kʼoa ibi koansjaile. Jé tínrʼoéle kʼoa tíkjonangile chjota xi bakóya kjoatéxoma. Kʼoa tokʼoamale ngatsʼi chjota jokji kjoachjine tjínle. Tonga María kitsole: “Ji ʼndí, ánni nga kʼoakinikaosíninaijin. Je nʼaili kʼoa kao an tinikjaolaijin nga tifasjailaijin”.

Jesús kitso: “Ánni nga an tifasjaisíninao. A tsínlaná tjínjinno nga i̱ tjínnele koatejna i̱ ndʼiale Nʼaina”.

Jaon, je Jesús tsjoake koan nga ya tsakʼejna jñani tsakʼinyale xi tʼatsʼe Niná. Kʼoati sʼian tsandañá, a tsí jaon. Je Jesús ki ngantsjai je kjoajtín xi kisatio ya Nazaret jña tsaʼyaxkón Niná nga xki̱ xomana. Nga nda kinrʼoé ngantsjai, nʼio tse xi koanle xi tsʼe Biblia. Kui koanngintjenngia je choa̱le Jesús.