HISTORIA 87
Ta̱ loʼo Jesús ndíka̱a̱ra ini templo
KOTO ta̱ loʼo ta̱ káʼa̱n xíʼin na̱ maestro yóʼo. Na̱yóʼo kúú na̱ maestro na̱ sánáʼa̱ xa̱ʼa Ndióxi̱ ini templo ñuu Jerusalén. Ta̱ loʼo yóʼo kúú ta̱ Jesús xa̱xa̱ʼnura ta vitin ndíka̱a̱ra 12 ku̱i̱ya̱.
Ta na̱ maestro yóʼo iin ndákanda̱-inina xa̱ʼa ña̱ xíni̱ní ta̱ Jesús xa̱ʼa Ndióxi̱ xíʼin xa̱ʼa Biblia. Soo, ¿ndachun kǒo ta̱ José xíʼin ñá María ndóo yóʼo? ¿Míí ku̱a̱ʼa̱nna? Yóʼo kunda̱a̱-iniyó xa̱ʼana.
Ku̱i̱ya̱ tá ku̱i̱ya̱ xi̱xaʼa̱n ta̱ José xíʼin na̱ veʼera ña̱ xi̱ndasakáʼnuna ña̱ pascua. Káni̱ní kíndo̱o ñuu Nazaret xíʼin ñuu Jerusalén. Ta tiempo saá, kǒo carro ni tren níxi̱yo. Na̱ yiví na̱ xi̱ndoo tiempo saá nina xi̱xika xáʼavana, nda̱a̱ u̱ni̱ ki̱vi̱ xi̱xikana saáví xi̱xa̱ana ñuu Jerusalén.
Soo vitin ta̱ José ku̱a̱ʼání kúú se̱ʼera. Íyo ta̱a xíʼin ná si̱ʼí na̱ válíka nu̱ú ta̱ Jesús, ta xíniñúʼu kiʼinra kuenta xíʼin na̱yóʼo. Tándi̱ʼi ña̱ pascua, ta̱ José xíʼin ñá María xíʼin na̱ va̱lí yóʼo ku̱a̱nu̱ʼúvana chí ñuu Nazaret, soo kǒo ta̱ Jesús ku̱a̱ʼa̱n xíʼinna, chi ña̱ túvi miína xíʼin inkava na̱ yiví na̱ ku̱a̱ʼa̱n xíʼinna ku̱a̱ʼa̱nra. Soo tá ku̱a̱ʼa̱n kúaa xi̱kundatu loʼona ta ki̱xaʼána nándukúnara ta kǒora ndániʼína. Ki̱xaʼána nándukúnara tañu na̱ táʼanna xíʼin na̱ migona, ta kǒora ndániʼína. Ña̱kán va̱ʼaka nda̱ndikóna chí ñuu Jerusalén ña̱ nandukúnara.
Tá ni̱xa̱a̱na kán, saáví nda̱niʼínara. Xíʼin na̱ maestrova ndíka̱a̱ra xíniso̱ʼora ña̱ káʼa̱nna ta ndáka̱tu̱ʼunrana. Ndiʼi na̱ yiví yóʼo kǒo kándíxa-inina xa̱ʼa ña̱ xíni̱ní ta̱ Jesús xa̱ʼa Ndióxi̱. Soo ñá María káchiñá: ʼTa̱ loʼo, ¿ndáaña kéʼún ndíka̱ún yóʼo? Ndíʼikaví-inindi̱ xa̱ʼún ta nándukúkavíndi̱ yóʼóʼ.
ʼ¿Ndachun xíkandó nándukúndó yi̱ʼi̱? ¿Á kǒo xíni̱vandó ña̱ xíniñúʼu kundikai̱ veʼe Yivái̱?ʼ, káchi ta̱ Jesús xíʼinñá.
Ta̱ Jesús xi̱kutóoníra ku̱ʼu̱nra nu̱ú kivi sakuaʼara xa̱ʼa Ndióxi̱. Saátu miíyó saá xíniñúʼu kooyó. Tá ni̱xi̱yo ta̱ Jesús ñuu Nazaret semana tá semana xi̱xaʼa̱nra veʼe nu̱ú xi̱ndasakáʼnuna Ndióxi̱. Tá xi̱xaʼa̱nra nina xi̱xiniso̱ʼora ña̱ xi̱ka̱ʼa̱nna, ña̱kán va̱ʼaní sa̱kuaʼara xa̱ʼa ku̱a̱ʼání ña̱ʼa ña̱ va̱xi nu̱ú Biblia. Xíniñúʼu kundiku̱nyó yichi̱ ta̱ Jesús.
