Historia 87

Telpokatsin Jesús ipan teopan

XKITA yejuin telpokatsin akin tlajtoua iuan tlakamej uejueyimej. Yejuamej tlamachtijkej ipan iteopan toTajtsin, tlen onka Jerusalén. Niman yejuin telpokatsin itoka Jesús. Melak yonoskalti. Aman kipiya 12 xiuitl.

Tlamachtijkej melak tlamojkaitaj ika Jesús melak kimatstika itech toTajtsin niman itech tlen ijkuiliujtika ipan Biblia. San ika, ¿tleka xnikan nemij José iuan María? ¿Kanon nemij? Matikitakan.

Nochi xiujtin José kinuika ichanejkauan ne Jerusalén niman ijkon konpanoltiaj iluitl itoka Pascua. Melak uejka tinejnemis itech Nazaret hasta Jerusalén. Xakaj kipiya carro, nion xtlaj trenes. Xtlaj onkatka ipan yejon tonaltin. Miyekej san nejnemij, niman yejuamej nejnemij yeyi tonajli ika ajsij Jerusalén.

Aman José miyekej ikoneuan. Kuakon kipiya ika kintlajpiyas ikniuan Jesús, akin pitentsitsintin. Aman tej, ipan yejuin xiuitl José iuan María inokueptokej Nazaret iuan ikoneuan. Kinemiliaj ika Jesús nemi iuan oksekimej akin noijki nokueptokej. Ika teotlak ijkuak onoseuijkej, opeuj kitejtemouaj niman xokinextijkej. ¡Kitejtemouaj itsajlan akin ken kimitaj, akin imiuan nouikaj, niman xkinechtiaj! Kuakon oksejpa nokuepaj Jerusalén, kontejtemouaj.

Aman nikan kinextiaj. Kinkaktika tlamachtijkej niman kintlajtoltijtika. Niman pampa melak kipiya tlamachilistli nochimej tlamojkaitaj. San ika, María kijlia: ‘Nokoneuj, ¿tleka ijkon yotitexchiuilij? Nejua iuan motaj melak yototekipachojkej, niman timitstejtemojtinemij’.

‘¿Tleka ninechtejtemouaj?’, tlanankilia Jesús. ‘¿Xnenkimatiyaj ika kipiya ika ninemis ipan ichan noTaj?’

Kema, Jesús kuelita nemis kampa uelis nomachtis itech toTajtsin. Tejuamej noijki noneki ijkon matikchiuakan, ¿xmelak? Ne ipan Nazaret, Jesús yaya ipan tlanechikoltin nochi semanas. Pampa yejua nochipa tlakaktoya, ouel miyek itech Biblia. Noijki matikchiuakan ijkon ken Jesús.

Lucas 2:41-52; Mateo 13:53-56.