ONOONO la ke he tama taane tote kua tutala ke he tau tagata lalahi nei. Ko lautolu ko e tau akoako he faituga he Atua i Ierusalema. Ti ko e tama taane, ko Iesu. Kua lahi tuai a ia. Ko e mogonei kua 12 haana a tau he moui.

Ne ofo lahi e tau akoako ha kua iloilo lahi a Iesu hagaao ke he Atua mo e tau mena ne tohia he Tohi Tapu. Ka ko e ha kua nakai ha ha i ai foki a Iosefa mo Maria? Ko fe a laua? O mai la ke kumikumi.

He tau tau oti ne tamai e Iosefa e magafaoa haana ki Ierusalema ma e fakamanatuaga pauaki ne fakahigoa ko e Paseka. Ne loa e fenoga mai i Nasareta ki Ierusalema. Ai fai tagata ne fai motoka, ti ai fai tuleni foki. Nakai fai mena pihia a lautolu he vahā ia. Ne ō hui e laulahi he tau tagata, ti kavi ke he tolu e aho ka o atu a lautolu ato hohoko ki Ierusalema.

Ko e mogonei kua lahi e magafaoa ha Iosefa. Ti ha ha i ai foki e tau lafu ikiiki ha Iesu ke leveki. He tau nei, ko Iosefa mo Maria kua fitā ni he o atu he fenoga loa mo e tau fanau ikiiki ha laua he liliu ki kaina i Nasareta. Ne manatu a laua ko Iesu haia mo e falu ne fakatauō he fenoga. Ka e he tutū a lautolu he matahiku he aho, ne nakai kitia e laua a Iesu. Ne kumi e laua a ia ke he tau magafaoa mo e tau kapitiga ha laua, ka kua nakai ha ha a ia mo lautolu! Ti liliu a laua ki Ierusalema ke kumi a ia i ai.

Fakahiku ai ne moua e laua a Iesu he mena nei mo e tau akoako. Kua fanogonogo a ia ki a lautolu mo e hūhū e tau hūhū. Ti kua ofoofogia e tau tagata oti he iloilo ha Iesu. Ka kua pehē a Maria: ‘Ma mea, ko e ha kua taute e koe e mena nei ki a maua? Kua tupetupe lahi haau a matua taane mo au foki he lali ke kumi ia koe?’

‘Ko e ha ne kumi e mua au?’ he tali e Iesu. ‘Nakai kia iloa e mua na lata au ke nofo he fale he haaku a Matua?’

E, kua fiafia lahi a Iesu ke nofo he mena ke maeke a ia ke fakaako hagaao ke he Atua. Lata nakai a tautolu ke fai logonaaga pihia foki? He kaina i Nasareta, ne fano a Iesu ke he tau feleveiaaga ma e tapuakiaga he tau faahi tapu oti. Ha kua fanogonogo tumau a ia, ne fakaako e ia loga e mena mai he Tohi Tapu. Kia tatai a tautolu mo Iesu mo e mumuitua ke he fakafifitakiaga haana.