BONA mošemane yo a bolelago le bakgalabje ba. Ke barutiši ka tempeleng ya Modimo Jerusalema. Mošemane yo ke Jesu. O tloga a godile. Ga bjale o na le nywaga e 12.

Barutiši ba ba makaditšwe ke gore Jesu o tseba ditaba tše dintši kudu ka Modimo le dilo tšeo di ngwadilwego ka Beibeleng. Eupša ke ka baka la’ng Josefa le Maria ba se gona mo? Ba kae? Anke re bone.

Ngwaga o mongwe le o mongwe, Josefa o be a etla le lapa la gagwe Jerusalema monyanyeng o kgethegilego wo o bitšwago Paseka. E be e le leeto le letelele go tloga Natsaretha go ya Jerusalema. Go be go se na motho yo a bego a na le koloi e bile le diterene di be di se gona. Batho ba be ba se na tšona mehleng yeo. Batho ba bantši ba be ba sepela ka maoto gomme go be go ba tšea matšatši a e ka bago a mararo gore ba fihle Jerusalema.

Mo nakong ye, Josefa o be a na le lapa le legolo. Ka baka leo, go be go na le bana babo Jesu ba banyenyane bao ba bego ba swanetše go hlokomelwa. Ngwageng wo, Josefa le Maria ba ile ba tloga Jerusalema le bana ba bona gomme ba tšea leeto le letelele la go boela gae Natsaretha. Bona ba be ba nagana gore Jesu o sehlopheng sa batho bao ba sepelago le bona. Eupša ge ba khutša tseleng, ba hwetša a se gona. Ba mo nyaka gare ga metswalo ya bona le bagwera, eupša ba se mo hwetše! Ka gona ba boela Jerusalema ba yo mo nyaka moo.

Mafelelong ba mo hwetša mo a na le barutiši ba. O be a ba theeditše e bile a ba botšiša dipotšišo. Batho ka moka ba be ba makaditšwe ke kamoo Jesu a lego bohlale ka gona. Eupša Maria a re go yena: “Ngwanaka, ke ka baka la’ng o re dirile ka tsela ye? Nna le tatago re be re go nyaka re tshwenyegile kudu.”

Jesu a re go bona: “Ke ka baka la’ng le be le nnyaka? Na le be le sa tsebe gore ke swanetše go ba ntlong ya Tate?”

Ee, Jesu o be a rata go ba moo a ka ithutago ka Modimo. Na ye ga se tsela yeo le rena re swanetšego go ikwa ka yona? Ge Jesu a be a le ga gabo kua Natsaretha, o be a eya dibokeng beke e nngwe le e nngwe. Ka ge ka mehla a be a theetša ka kelohloko, o ile a ithuta dilo tše dintši ka Beibeleng. Anke le rena re swane le Jesu gomme re latele mohlala wa gagwe.

Luka 2:41-52; Mateo 13:53-56.