NEA kakula ekyi ne mɔɔ nee mgbanyima ɛhye mɔ ɛlɛtendɛ la. Bɛle kilehilevolɛma wɔ Nyamenle ɛzonlenlɛ sua ne anu wɔ Gyɛlusalɛm. Na kakula ne a le Gyisɛse. Yenyi ekyii. Kɛkala yeli ɛvolɛ 12.

Ɔzinle kilehilevolɛma ne anwo kpole kɛ Gyisɛse lɛ Nyamenle nee ninyɛne mɔɔ bɛhɛlɛ wɔ Baebolo ne anu la anwo nrɛlɛbɛ kpole a. Noko duzu ati a Dwosefi nee Mɛle ɛnle ɛke bie a? Bɛwɔ ni? Maa yɛnlea.

Ɛvolɛ biala Dwosefi fa ye abusua ne kɔ Gyɛlusalɛm kɔdi ɛvoyia titile ne mɔɔ bɛfɛlɛ ye Akpabɛnwo ne la. Ɔvi Nazalɛte mɔɔ kɔ Gyɛlusalɛm la le adenle tendenle. Awie biala ɛnlɛ kale, yɛɛ keteke biala ɛnle ɛkɛ. Ɛnee bɛnle ɛkɛ wɔ zɔhane mekɛ ne anu. Ɛnee menli dɔɔnwo tia, na ɛnee bɛdi kenle kɛyɛ nsa na bɛadwu Gyɛlusalɛm.

Mekɛ ɛhye anu ɛnee Dwosefi abusua ne ɛyɛ kpole. Yemɔti ɛnee Gyisɛse amediema mrenya nee mraalɛ ngakula wɔ ɛkɛ ne mɔɔ ɔwɔ kɛ bɛnea bɛ a. Wɔ ɛvolɛ ɛhye anu, ɛnee Dwosefi nee Mɛle nee bɛ mra ne mɔ ɛlɛtia adenle tendenle ne azia ahɔ Nazalɛte. Ɛnee bɛdwenle kɛ Gyisɛse boka menli mɔɔ ɛlɛkɔ la anwo. Noko mekɛ mɔɔ bɛdiale kenle ko adenle bɛwiele la, bɛannwu Gyisɛse. Bɛkpondɛle ye wɔ bɛ mbusua nee bɛ gɔnwo mɔ avinli, na bɛannwu ye! Yemɔti bɛziale bɛhɔle Gyɛlusalɛm kɛ bɛkakpondɛ ye wɔ ɛkɛ.

Awieleɛ kolaa bɛnwunle Gyisɛse kɛ ɔde kilehilevolɛma ne mɔ avinli. Ɛnee ɔlɛtie bɛ na ɔbizebiza bɛ kpuyia. Na kɛzi Gyisɛse ze nrɛlɛbɛ la zinle menli ne kɔsɔɔti anwo. Na Mɛle zele kɛ: ‘Me ra, duzu ati a wɔyɛ yɛ zɛhae ɛ? Nea, me nee ɛ ze yɛvɛ kpalɛ wɔ wɔ ɛkpondɛlɛ nu.’

Gyisɛse buale bɛ kɛ: ‘Duzu ati a bɛkpondɛ me ɛ? Bɛnze kɛ ɔwɔ kɛ metɛnla me Ze sua nu ɔ?’

Ɛhɛe, ɛnee Gyisɛse kulo kɛ ɔtɛnla ɛleka mɔɔ ɔkola ɔsukoa Nyamenle anwo debie la. Asoo tɛ kɛ ɔwɔ kɛ yɛdayɛ noko yɛte nganeɛ la ɛ? Mɔɔ Gyisɛse hɔle sua nu wɔ Nazalɛte la, ɛnee ɔkɔ ayia ɔkɔsonle dapɛne biala. Ɔluakɛ ɛnee dahuu ɔyɛ ɛnzolɛ ɔtie edwɛkɛ ne la ati, ɔzukoale ninyɛne dɔɔnwo ɔvile Baebolo ne anu. Bɛmaa yɛyɛ kɛ Gyisɛse la na yɛli ye neazo ne anzi.