CHAWILAMPEʼ ri ala tijan kchʼaw kukʼ ri achijabʼ. Wa täq achijabʼ riʼ e ajkʼamal bʼe pa ri loqʼalaj ja rech ri Ajawaxel pa ri Jerusalén. Ri ala are ri Jesús. Nim chik, kʼo chi 12 ujunabʼ.

Ri täq ajkʼamal bʼe xkexibʼij kibʼ che ri Jesús rumal che nim retaʼmbʼäl chirij ri Ajawaxel xuqujeʼ chirij ri tzʼibʼatal pa ri Loqʼalaj Pixabʼ. Tekʼuriʼ, ¿suche e kʼo ta waral ri José xuqujeʼ ri María? ¿Jachiʼ e kʼo wi? Chqilampeʼ.

Ronojel täq junabʼ José kukʼam lo ri ufamilia pa Jerusalén rech kebʼe pa ri nimqʼij nim ubʼantajik ubʼiʼ Pascua. Naj ri bʼe Nazaret rech keʼopan Jerusalén. Nijun kʼo uchʼichʼ. Ojer kʼo ta wariʼ. Kʼi chike ri winaq kebʼin che kaqan, kkekoj oxibʼ qʼij rech keʼopan Jerusalén.

Kimik ri José kʼo chi jun nim ufamilia. Rumal laʼ rajawaxik che José keʼuril ri täq uchaqʼ ri Jesús xuqujeʼ ri täq ranabʼ. Tekʼuriʼ che wajun junabʼ riʼ, ri José rukʼ ri María xuqujeʼ ri täq kalkʼwal xetzalij Nazaret. Xkechomaj che ri Jesús kʼo kukʼ ri nikʼaj chik winaq che kebʼanom bʼi ri bʼe. Tekʼuriʼ chiʼ xkʼis ri qʼij xetekʼeʼik, tekʼuriʼ ri Jesús kʼo täj. ¡Xketzukuj che kixoʼl täq kifamilia xuqujeʼ che kixoʼl täq kachiʼl, tekʼuriʼ kʼo täj! Rumal laʼ xetzalij Jerusalén che utzukuxik.

Kʼisbʼal re xkeriq chilaʼ. Tijan keʼuta ri täq ajkʼamal bʼe xuqujeʼ tijan kuta täq tzij chike. Ronojel ri winaq xkexibʼij kibʼ che sibʼalaj nim retaʼmbʼäl. Tekʼuriʼ María xubʼij che: ‹Wal, ¿suche xabʼan wariʼ chaqe? Sibʼalaj xojok che atzukuxik›.

‹¿Suche xinitzukuj?› Xchaʼ Jesús. ‹¿La iwetaʼm täj che rajawaxik in kʼo pa rachoch ri Nutat?›

Ri Jesús sibʼalaj utz krilo kʼo jachiʼ kretaʼmaj wi chirij ri Ajawaxel. Öj rajawaxik che jelaʼ kqabʼano ¿la qastzij? Chilaʼ Nazaret, Jesús kbʼe pa täq riqbʼal ibʼ che uyaʼik uqʼij ri Ajawaxel ronojel täq semana. Rumal che ri Jesús kuta ronojel ri kbʼixik, xretaʼmaj kʼi täq jastaq chirij ri Loqʼalaj Pixabʼ. Chqabʼanaʼ qe junam rukʼ xubʼan Jesús.