KONNI jajjabbu manni ledo hasaawanni nooha shiima beetto lai. Jajjabbu mannooti Yerusaalamete Maganu mine heedhanno rosiisaanooti. Shiimu beetti kayinni Yesuusaati. Isi lophphino. Xa isira 12 diro ikkinosi.

Yesuusi Maganunnirenna Qullaawu Maxaafi giddo borreessinoonnire seekke afino daafira, rosiisaano xaggeessidhu. Kayinni Yooseefinna Maariyaami koye nookkihu mayiraati? Insa hiikko no? Hanni laˈno.

Yooseefi Faasikaho yinanniha mitto baxxino ayyaana ayirrisate maatesi diru dirunku Yerusaalame massanno. Naazireetetenni Yerusaalamete geeshsha noo doogo seedate. Hakkawaro kaameela afiˈrinohu mittuno dino; qoleno kaameelu gede mannu gidde haˈrannohu baaburu dino. Rooriidi manni lekkatenni haˈranno; Yerusaalame sasu barri geeshsha haˈre iillanno.

Xa Yooseefira maatesi halaˈlado ikkitu. Konni daafira Yesuusi towaatannori labballunna seennu maaˈnuullu roduuwi noosi. Konne diro Yooseefinna Maariyaami qaensa Naazireete higate oosonsa ledo seeda doogo hadhu. Insara Yesuusi wolu manni ledo daanni nooha lawinonsa. Hashsheenna mittowa fooliishshidhu wote, Yesuusi dino. Nookka yite fiixinsawanna jaallansawa laˈanno wote, insa ledono dino! Konni daafira iso hassara galagalte Yerusaalame higgu.

Gedensaannino marte Yesuusi koye rosiisaanote ledo nooha affu. Martanno wote, isi rosiisaano yitannore macciishshanni no; qoleno insa xaˈmo xaˈmanni no. Yesuusi hayyichcha ikkasinni woˈmunku manni xagge assiri. Maariyaami kayinni togo yitusi: ‘Beettoˈya, togo mayira assittonke? Annikkinna ani ate hansanni lowo geeshsha mitiiˈminoommo.’

Yesuusi qole togo yii: ‘Mayira hassinoonnie? Anniˈya mine heeˈra hasiissannoeta diaffinoonni?’

Addaho, Yesuusi Maganunnire rosiinsanniwa heeˈra baxanno. Ninkeno hattoowa haˈra dibaxisannonke? Yesuusi Naazireetete noo waro Magano magansiˈrate saammintete kiiro gambooshshe haˈranno. Isi duuchchanka wote hixamanynye harunsanno daafira, Qullaawu Maxaafinni lowo roso afiˈrino. Ninkeno Yesuusi gede ikkino; hattono isi lawishsha harunsino.