Jesosy Tamy Tempoly Tao
Tantara 87
Jesosy Tamy Tempoly Tao
MBA henteo moa ajà lahilahy miresake amin’olobe reo io. Mpampianatse amy tempoli-Ndranahare a-Jerosalema ao lahilahy reo. Jesosy ajà lahilahy io. Fa nihabe ie, ka fa 12 tao henany zao.
Tserike biby lahilahy reo mahita an’i Jesosy mahay raha maro mikasike an’Andranahare noho ty raha voasoratse amy Baiboly ao. Fe nanaìa Josefa noho Maria tsy miarake amin’i Jesosy eto io? Ndao ho henteantsika.
Andesin’i Josefa a-Jerosalema ane ty fianakaviane isan-tao, mba hamonjy fety atao hoe Paska zay. Lavitse biby ty lala baka a-Nazareta ho a-Jerosalema ane. Tsy nisy olo nana tomabily tamy fotoa io, ka nandeha an-tomboke iaby ty ankamaroan’olo. Mila mandeha telo andro roze, vo ho avy a-Jerosalema ane.
Fa mana fianakaviam-be Josefa henany zao. Nanan-jày lahilahy noho ampela kea Jesosy, ka azo antoke fa hikarakara soa anane iaby reo Josefa. Nanao lia lavitse himpòly a-Nazareta ane miarake amy anane reo Josefa noho Maria tamy tao io. Nieritseritse roze fa tan-dala eny niarake tamin’olo hafa Jesosy. Fe laha fa niavy ty hariva, le mbo tsy nihitan-droze avao Jesosy. Sahìra nila an’i Jesosy tamy longon-droze noho naman-droze tany Josefa noho Maria, fe tsy nahita aze! Ka nandeha nimpòly a-Jerosalema ane ndraike roze mba hila aze.
Nihita tamy tempoly tao, niarake tamy mpampianatse reny Jesosy, tamy farane. Nijànjy soa mpampianatse reo ie, sady nametrake fanontanea tamin-droze kea. Maro ty olo nitserike laha fa nahita ty fahihìran’i Jesosy. Fe hoy ty asan’i Maria hoe: ‘Ino lahy raha ataonao aminay toy anako? Sahìra nila anao zahay.’
‘Nanino nareo sahìra nila ahy io?’, hoy ty asan’i Jesosy nanontany. ‘Tsy fa hainareo va, fa tokone ho an-tranon’i Babako ato avao ro misy ahy?’
Tean’i Jesosy ty mandeha amy toera ahafàhane mianatse raha maro mikasike an’Andranahare. Tsy tokone hanahake aze kea va tsika? Laha fa noly ta-Nazareta ane Jesosy, le nazoto namonjy fivoria mba hivavake isan-kerinandro. Nijànjy soa ie tany, ka nahay raha maro baka amy Baiboly ao. Tokone hanahake an’i Jesosy tsika, ka hanorike ty ohatse nengàne.
Lioka 2:41-52; Matio 13:53-56.
