AWONA musepuka wakuyowoya na ŵanalume ŵalara. Ŵanalume aŵa ŵakaŵa ŵasambizgi mu tempele la Ciuta mu Yerusalemu. Ndipo musepuka uyu ni Yesu. Wakura pacoko waka. Pa nyengo iyi wakaŵa na vilimika 12.

Ŵasambizgi aŵa ŵakazizwa comene kuwona kuti Yesu wakamanyanga vinandi vyakukhwaskana na Ciuta na ivyo vili kulembeka mu Baibolo. Kweni kasi nchifukwa wuli Yosefe na Mariya apa palije? Kasi ŵali nkhu? Tiye tiwone.

Cilimika cilicose Yosefe wakalutanga na mbumba yake ku Yerusalemu kukacita ciphikiro capadera ca Paska. Ni ulendo utali kufuma ku Nazarete kuluta ku Yerusalemu. Palije uyo wakaŵa na galimoto panji njinga. Pa nyengo yira kukaŵavya vinthu ivi. Ŵanthu ŵanandi ŵakacitanga kwenda pasi, ndipo kukaŵatoleranga pafupifupi mazuŵa ghatatu kuti ŵafike ku Yerusalemu.

Pa nyengo iyi Yosefe wakaŵa na ŵana ŵanyake. Ntheura pakaŵaso ŵanung’una na ŵadumbu ŵa Yesu ŵakuti waŵapwelelere. Pa cilimika ici Yosefe na Mariya ŵakanyamuka na ŵana ŵawo pa ulendo wawo utali wakuwelera kukaya ku Nazarete. Iwo ŵakaghanaghana kuti Yesu wali mu wumba. Kweni ŵati ŵendapo kwa zuŵa lumoza, Yesu wakawoneka yayi. Ŵakamba kumupenja mu ŵabali na ŵabwezi ŵawo, kweni wakaŵa na iwo yayi! Ntheura ŵakawelera ku Yerusalemu kukamupenja.

Paumaliro pake ŵakamusanga wali na ŵasambizgi. Wakategherezganga na kuŵafumba mafumbo. Ndipo ŵanthu wose ŵakazizwa na vinjeru vya Yesu. Mariya wakati: ‘Wa mwana, kasi wacitiraci nase nthena? Ŵadada ŵako na ine taŵa ŵakwenjerwa comene kukupenja.’

‘Kasi mwanipenjerangaci?’ Yesu wakazgora ntheura. ‘Kasi mukamanyanga yayi kuti nkhwenera kuŵa mu nyumba ya Ŵadada?’

Enya, Yesu wakatemwa kuŵa uko wangasambira za Ciuta. Kasi umu ndimo nase tikwenera kucitira yayi? Kukaya kwake ku Nazarete, Yesu wakalutanga ku maungano kukasopa sabata yiliyose. Cifukwa cakuti wakategherezganga nyengo zose, wakasambira vinthu vinandi kufuma mu Baibolo. Tiye nase tiŵe nga ni Yesu na kulondezga ciyelezgero cake.