ILAWIL te kerem te yak ta kʼop sok te machʼatik ayix bayal yaʼbilalike. Jaʼik te jpʼijubteswanejetik ta Templo yuʼun Dios ta Jerusalén. Te kerem ya awile jaʼ te Jesuse. Mukʼubix, melel ayix lajchayeb yaʼbilal-a.

Te jpʼijubteswanejetik chajpnax la yilik-a te bitʼil kʼax bayal ya snaʼ ta swenta Dios te Jesuse, soknix ta swenta te bintik tsʼibaybil ta Bibliae. Jaʼukmeto, ¿bin yuʼun te ma liʼ ayuk te José sok te Mariae? ¿Banti ayik-a? Yame kiltik bael.

Ta jujun jaʼbil te José ya yikʼ bael ta Jerusalén te jayeb machʼa ay yuʼun ta spasel te kʼin yuʼun Pascua. Ta Nazaret kʼalalto ta Jerusalén kʼax namal te sbelale. Maʼyuk machʼa ay scarro-a sok maʼyuk avionetik-a, melel mato ayuk spisil-a ini. Jteb ma spisiluk ya xbeenik ta yakanik-a te ants winiketike. Jich yuʼun te machʼatik bajtʼik ta Jerusalene oxebniwan kʼajkʼal beenik.

Ta yorail-abi bayalix te machʼatik ay yuʼun te Josee, melel ayix yijtsʼinab kerem achʼixetik te Jesús te ya skʼanik kanantayele. Ta jaʼbil-abi te José sok te María yakalikix ta sujtel bael ta Nazaret. La skuyik te sjokinej talel te yantik ants winiketik te Jesuse. Jaʼukmeto te kʼalal la skux yoʼtanik te kʼalal beenemikix jun kʼajkʼal-ae, ma la staik te Jesuse. ¡Kaj sleik ta yolil te jayeb machʼatik ay bin yutoj sbaik soke soknix ta yolil te yamigotakike, jaʼukmeto ma la staik tey-a! Jich yuʼun sujtik bael ta Jerusalén ta sleel.

Tey kʼot staik jich bitʼil ya awil liʼ ini. Yak ta yaʼiyel stojol te bintik ya yal te jpʼijubteswanejetike sok yak ta spasbeyel jojkʼoyeletik. Spisil chajpnax ya x-ilot yuʼun-a te ants winiketik ta swenta te spʼijile. Jaʼukmeto te María jich la yal: Kerem, ¿bin yuʼun te jich la apasbonkotik ini? Te joʼon sok te atate yakonkotik ta mel oʼtan ta jlebelatkotik.

Jich la yal te Jesús: ¿Bin yuʼun te yak alebelonike? ¿Yuʼunbal ma xanaʼik te liʼ ya skʼan ya x-ayinon ta sna te jTate?

Yuʼunix jich-a, bayal la smulan ayin tey-a te Jesús te banti juʼ yuʼun snopel ta swenta te Diose. ¿Mabal jichuk te jich ya skʼan ya jpastik euke? Ta jujun semana bajtʼ ta tsoblej te Jesús ta Nazaret. Bayal bintik la snop ta swenta te Bibliae, melel spisil ora la schʼam yaʼiy ta lek te skʼop Diose. Akʼa jtʼumbeytik te stalel te Jesuse.