TALA ño kakuenje u o kasi oku sapela ndeti lakulu ava. Ovo alongisi vo vonembele ya Suku ko Yerusalãi. Kakuenje u, Yesu. Eye kaliye wa kula, cilo o kuete ekũi la vavali kanyamo.

Alongisi va kasi oku komõha calua omo Yesu wa kũlĩha ovina vialua viatimẽla ku Suku levi via sonehiwa Vembimbiliya. Momo lie Yosefe la Maria ka va kasililipo? Pi hẽ ovo va kasi? Tu ci konomuisi.

Unyamo lunyamo Yosefe wa endaile lepata liaye ko Yerusalãi kofesta yo Paskoa. Wa kala ungende umue walua, oku tunda ko Nasara toke ko Yerusalãi. Koloneke viaco, lomue wa kuata ekãlu ndaño omboyo. Omanu va endaila posi. Oco va pitĩle ko Yerusalãi va endaile oloneke vitatu.

Cilo Yosefe o kuete epata linene. Ca sukilile oku tata omãla vatito, vamanji a Yesu. Kunyamo waco, Yosefe la Maria kuenda omãla vavo va linga ungende woku tiukila ko Nasara. Ovo va sima okuti Yesu wa kala kumue lomanu vakuavo va kala oku lingavo ungende. Koñolosi eci va puyukapo va limbuka okuti Yesu ka kalepo. Vo sandiliya pokati kavangandiavo lakamba vavo, pole ka vo sangele pokati kavo. Omo liaco, Yosefe la Maria va tiukila ko Yerusalãi oku ko sandiliya.

Noke va sanga Yesu pokati kalongisi. Eye wa kala loku va yevelela kuenda oku va linga apulilo. Omanu vosi va komõha calua oku loñoloha kua Yesu. Pole, Maria wa popia laye hati: ‘Amõlange nye wa lingila eci letu? Isiove lame tua yokokele calua.’

Yesu wa kumbulula hati: ‘Nye wa ndi sandiliyili?’ ‘Ka wa kũlĩhĩli okuti nda sesamẽla oku kala vonjo ya Tate?’

Yesu wa solele calua oku kala apa va lilongisa eci catiamẽla ku Suku. Ku tava okuti, eyi ongangu yimue tu sukila oku kuama? Eci va pitĩla ko Nasara, Yesu wa endaile kolohongele olosemana viosi. Omo okuti eye wa enda oku yevelela lutate, wa lilongisa ovina vialua viatiamẽla Kembimbiliya. Omo liaco, tu kuami ongangu ya Yesu konepa eyi.

Luka 2:41-52; Mateo 13:53-56.