Tantara 87

Jesosy Nandeha Tamy Tempoly

ZAHAVA tsaiky mikoran̈a amy matoelahy aby io. Irô io mpampianatra tamy tempolin’ny Zan̈ahary ta Jerosalema. Jesosy tsaiky io. Izy iziô 12 taon̈o.

Mpampianatra aby io gaga nahita Jesosy mahay raha maro mikasiky Zan̈ahary, ndreky raha voasoratra an̈aty Baiboly. Nan̈ino ma Josefa ndreky Maria tsy niaraka taminany? Aia irô? Alô zahavatsika nahavy zen̈y.

Isaka taon̈o, Josefa ndreky Maria, ndreky zanakan-drô mandeha a Jerosalema, man̈ano fetin’ny Paska. Lavitry boaka Nazareta mandeha Jerosalema. Tamy zen̈y, tsendriky nisy tomabily, ndreky taxibe. Ankamaraozan’olo nandeha vity, ke afaka telo andra irô vo navy ta Jerosalema.

Josefa iziô fa maro anaka. Rahalahin’i Jesosy ndreky anabaviny tamy zen̈y mbala hely. Tamy taon̈o io, Josefa ndreky Maria niaraka tamy zanakan-drô nan̈ano diabe himpody ta Nazareta. Ambaran-drô niaraka tamin’olo sasany lôso aloha an̈y Jesosy. Koa fa tsôfotro andra, irô nidôkodôko, zahan-drô Jesosy tsy tiô. Izy koa fa tsy hitan-drô tamy havan-drô ndreky kamaradin-drô, irô nimpody ta Jerosalema hitady izy.

Tamy farany, Jesosy hitan-drô nikoran̈a tamy mpampianatra aby io. Izy nitandren̈y raha nivolan̈in-drô, baka iô nan̈ontany irô. Gaga olo jiaby nahita fahaizan’i Jesosy. Fa volan̈in’i Maria: ‘Ah zanako, nan̈ino ma anao mampijaly zahay? Zahay aroen’ny babanao fa sahiran̈a nitady anao.’

Jesosy namaly kara’ty: ‘Nan̈ino ma anarô mitady zaho? Tsy hainarô ma fa zaho tsy maintsy midôko amy tran̈on’ny Babako?’

Jesosy tia midôko amy tany mety hahaizany raha mikasiky Zan̈ahary. Atsika koa tôkony han̈ano karaha zen̈y, sa karakôry? Lera Jesosy nimpody ta Nazareta, izy nazoto nandeha nivory, isaka erin̈andra. Izy nahay raha maro boaka tan̈aty Baiboly, fôtony izy nitandren̈y tsarabe tamy fivorian̈a tan̈y. Atsika koa, tôkony man̈ano karaha nataon’i Jesosy.

Lioka 2:41-52; Matio 13:53-56.