AKALOLE kamcanda kakakuŵecetana ni acakulungwaŵa. Jemanjaji ali ŵakwiganya m’nyumba ja Mlungu ku Yelusalemu. Kamcandaka kali Yesu. Akusile panandi. Sambano akwete yaka 12.

Ŵakwiganyaŵa akusimonga mnope kuti Yesu akumanyilila yejinji pakwamba ya Mlungu, soni akumanyilila yindu yejinji yayalembekwe m’Baibulo. Nambo ana ligongo cici Yusufu ni Maliya pangali pelepo? Ali kwapi? Kwende tulole.

Caka cilicose Yusufu akusajawula ku Yelusalemu ni liŵasa lyakwe kukutenda nawo cindimba cine cakolanjikwa kuti Pasaka. Kutyoka ku Nasaleti kwawula ku Yelusalemu uli ulendo welewu. Pangali jwakwete galimoto, soni kwangali sitima sya pa mkuli. Moŵa gelego kwaliji kwangali yindu yeleyi. Ŵajinji ŵajendaga wapasi, soni kuti akayice ku Yelusalemu ŵajendaga ciŵandika masiku gatatu.

Sambano jino Yusufu akwete liŵasa lyekulungwa. M’yoyo Yusufu akwetesoni ŵanace ŵane ŵali acapwakwe ni acalumbugwe ŵa Yesu ŵakuti ŵasamalileje. Caka celeci Yusufu ni Maliya yimpepe ni ŵanace ŵawo akuwujila ku Nasaleti wawuli ulendo wawulewu. Akuganisya kuti Yesu akwenda yimpepe ni ŵane paulendowu. Nambo pambesi palisiku pakupumula, Yesu ngakum’wona. Akumsosasosa pasikati pa acanasi ni acimjawo, nambo jwalakwe pangali! M’yoyo akuwujila ku Yelusalemu kukumsosasosa.

Kumbesi kwakwe akumsimana akuno ali ni ŵakwiganya. Akupikanila yakuŵeceta, soni akwawusya mawusyo. Ŵandu wosope akusimonga ligongo lya lunda lwa Yesu. Nambo Maliya akum’wusya kuti: ‘Mwanangu, ligongoci mtesile yeleyi? Une ni baba ŵenu twaliji ŵakudandawula mnope ligongo nganitum’wonaga.’

Yesu akwanga kuti: ‘Ligongo cici ŵasosaga une? Ana nganamanyililaga kuti une nasosekwaga kuŵa m’nyumba ja Atati ŵangu?’

Yesu akunonyela kuŵa pamalo gampaka alijiganyeje ya Mlungu. Ana m’weji ngatukusosekwasoni kunonyela yeleyi? Kumangwawo ku Nasaleti, Yesu ŵajawulaga mlungu uliwose kumisongano kukulambila. Ligongo lyakuti ndaŵi syosope ŵapikanilaga mnope, jwalakwe ŵalijiganyisye yejinji kutyocela m’Baibulo. Kwende tukuye cisyasyo cakwe.