ADKINTUFINGE tati palluma (paloma) petu naglu tati wentru tañi longko mu. Feychi wentru Jesu tati. Fewla niey kiñe küla mari tripantu. Ka mülelu kidu engu, Juan pingey. Dew kimüñmafiyiñ ñi kiñeke dungu. ¿Tukulpaymi Maria pemefilu ñi reñma Elisabet, ka tañi püñeñ mülelu ponwi Elisabet rüngküñpüramuluwi ñi ayüwün? Feychi petu choyüngenochi (llegnochi) püñeñ Juan pingey. Welu ¿chummekey (chumpi) Juan ka Jesu engu fewla?

Juan we ngüfoltükufi Jesu ti lewfü Jordan pingelu. Femngechi fawtisangekey ta che. Ngüfoltükungekey kiñe che ti ko mu, ka fey wüla entungeketuy. Juan femkefi tati pu che tüfa; feymu lle Juan Fawtisachefe pingekey. Welu ¿chumngelu (chemu) fawtisafi ta Jesu?

Feyürke may, Juan femi Jesu am küpalu “fawtisaen” pifi. Juan fawtisakefi tati pu che ayülu ñi pengelal ñi wedaduamkülen ñi wedake femün. Welu Jesu ¿wedalkay ñi femün ñi wiñoduamal? Femlay, Jesu chumkawnorume weda femkelay, kidu am Ngünechen ñi Fotüm ngey küpalu wenu. Feymu lle, niey ka dungu ñi feypiafiel ta Juan ñi fawtisayaetew. Peafiyiñ chuchi ngen.

Petu ñi küpanon Jesu ta Juan mu, mamüll mew küdawkefuy. Tati mamüll-küdawfe dewmakey mamüll küdaw, ta mesa ka wangku. Jose, Maria tañi füta (afkadi), mamüll küdawkefuy, ka kidu kimelelfi ta Jesu tañi ka femngeal. Welu Ngünechen werkülay tañi Fotüm Mapu mew tañi mamüll küdawfe ngeal. Niey kiñe falin küdaw kidu ñi femal, ka puwi ti antü fewla ñi femal. Feymu lle, küpay ñi pengelal tañi femal kom tañi Chaw ñi feypietew, Jesu feypifi ta Juan ñi fawtisayaetew. ¿Ayüy tüfa Ngünechen?

May, Jesu tripalu wüla ti ko mu, kiñe dungun küpalu wenu mapu mu feypi: ‘Fey tüfa ta iñche ñi Fotüm, ñi fentren ayüwelkeetew.’ Kafey, nülalu kechiley ti kallfü wenu, ka tüfachi palluma nagpay ta Jesu mu. Welu kiñe rüf palluma no tati. Kiñe palluma kechiley müten. Rüftu Ngünechen ñi lif küme püllü ngey.

Fewla Jesu müley ñi rakiduamal fentrenke dungu, fey mew amuy wellin mapu meli mari antü mu. Feymu Satana küpay kidu mu. Küla rupa Satana ayüfuy ñi femal Jesu ñi feyentunoafiel Ngünechen ñi pu ley dungu. Welu Jesu femlay tüfa.

Fey wüla tüfa, Jesu wiñotuy ka kimfi kiñeke wentru ñi pu wünen inanieetew, kam disipulu ngerpual. Kiñeke engün: Andre, Pedro (ka Simon pingey), Felipe ka Natanael (ka Fartolomeo pingey). Jesu ka tüfa engün, amuy ta Galilea trokiñ mapu mew. Fey mew witrakünuwürpuyngün Natanael ñi waria, Kana pingelu, chew müley kiñe mafün, feymu Jesu femi ñi wünen afmatun dungu. ¿Kimimi chem ngen? Tati ko, pülkukünufi.