Maana 88nan

Yuhana ye Yesu batise

E KA kɔnɔnin jigintɔ lajɛ cɛ kunkolo kan. Ntubanin dɔ don. O cɛ ye Yesu de ye. A si bɛ san 30 bɔ sisan. Cɛ min jɔlen bɛ a kɛrɛfɛ, o ye Yuhana ye. An ye fɛn kalan Yuhana kan ka tɛmɛ. An y’a ye ko Mariyama taara bɔ a balimamuso Elisabɛti ye tuma min na, den min tun bɛ Elisabɛti kɔnɔ, o panna nisɔndiya bolo. I hakili bɛ o la wa? O den min tun ma wolo fɔlɔ, o tun ye Yuhana de ye. Nka, Yuhana ni Yesu bɛ ka mun kɛ sisan?

Yuhana tilatɔ de filɛ nin ye ka Yesu su Jurdɛn baji la. Mɔgɔ bɛ batise o cogo de la. A tigi fari kuuru bɛɛ bɛ su ji la, ka tila ka a labɔ. Ikomi Yuhana tun bɛ to ka mɔgɔw batise, a welela ko Yuhana batiselikɛla. Nka, mun na Yuhana ye Yesu batise?

 Yuhana ye o kɛ bawo Yesu de nana a ɲini a fɛ a ka ale batise. Mɔgɔ minnu tun b’a fɛ k’a jira k’u nimisara u ka kojuguw la, Yuhana tun bɛ olu de batise. Nka, yala Yesu ye kojugu dɔ kɛ, a tun ka kan ka nimisa min na wa? Ayi. Yesu ma kojugu si kɛ. A tun ye Ala yɛrɛ de Denkɛ ye. A bɔra sanfɛ. O la sa, ni Yesu y’a ɲini Yuhana fɛ a ka ale batise, kun wɛrɛ tun bɛ o la. O tun ye kun jumɛn ye? An ka o lajɛ ɲɔgɔn fɛ.

Sani Yesu ka na Yuhana fɛ, a tun ye minise ye. Minise ye mɔgɔ ye min bɛ fɛnw dilan ni jiri ye, i n’a fɔ tabaliw, sigilanw ani banw. Mariyama cɛ Yusufu tun ye minise ye, o la, ale ye Yesu dege o baara la, walisa Yesu fana ka kɛ minise ye. Nka, Jehova tun ma a den ci ka na dugukolo kan walisa a ka kɛ minise ye. A tun b’a fɛ ka Yesu bila baara kɛrɛnkɛrɛnnen dɔ de la. O baara daminɛtuma tun sera sisan. O kosɔn, Yesu ye a ɲini Yuhana fɛ a ka ale batise walisa k’a jira sisan ko a nana ka a Fa sago kɛ. Yala o diyara Ala ye wa?

Ɔwɔ, o diyara Jehova ye, bawo Yesu bɔlen ji la, kumakan dɔ bɔra sankolo la, k’a fɔ ko: ‘Nin ye ne denkɛ ye min ko ka di ne ye.’ A bɔlen b’a fɛ ko, sankolo de dayɛlɛla, o waati la nin ntubanin jiginna Yesu kan. Nka, ntubanin yɛrɛyɛrɛ tun tɛ. A tun bɔlen bɛ a fɛ dɔrɔn de. Ala ka hakili senu tun don tigitigi.

Yesu tun ka kan ka miiri fɛn caman na sisan. O kosɔn, a taara yɔrɔ lankolon dɔ la tile 40. Sitanɛ taara Yesu sɔrɔ o yɔrɔ la, ka a kɔrɔbɔ siɲɛ saba, walisa a ka fɛnw kɛ minnu bɛ Ala ka sariyaw sɔsɔ. Nka, Yesu ma sɔn k’o fɛnw kɛ.

O kɔfɛ, Yesu seginna ka na. A ye cɛ dɔw ye minnu kɛra a nɔfɛmɔgɔ fɔlɔw ye. U dɔw tɔgɔ filɛ: Andre, Piɛrɛ (min welela fana ko Simɔn), Filipe ani Natanaɛl (min welela fana ko Bartɛlɛmi). Yesu ni o kalanden kuraw ye sira minɛ sisan ka taa Galile mara la. U selen Galile, u jɔra Kana, n’o ye Natanaɛl ka dugu ye. Yesu taara kɔɲɔ dɔ la. Dumuniba tun bɛ yen. Yesu ye a ka kabako fɔlɔ kɛ o yɔrɔ la. I b’a dɔn o kabako tun ye min ye wa? Yesu ye ji yɛlɛma ka kɛ diwɛn ye.

Matiyu 3:​13-17; 4:​1-11; 13:55; Marka 6:3; Yuhana 1:​29-51; 2:​1-12.