UNAMONO liembe unahulumuka ha mutwe wa umwe lunga? Lunga wacho kali Yesu. Haliapwila iye hakumbanyisa 30 a miaka. Lunga yoze alinenyi jina lienyi Yoano. Yetwe hi twalilongwesa chimwe chuma hakutwala kuli iye. Yena uneuluka muze Maria ayile ni kumeneka usoko wenyi Izabele, nawa mwana-kemba mu jimo lia Izabele yatumbuka ni chiseke? Mwana wacho te Yoano. Mba haliapwila yika Yoano ni Yesu analinga?

Yoano te hanjisa Yesu mu meya a Lwiji Yordau. Chenachize che akupapachisa mutu. Chitangu, mamunjisa mu meya, mba hi mamutuhwisamo. Chino che Yoano apwile ni kulinga kuli atu, kashika iye te akumuvuluka ngwo Yoano Chipapachisa. Mba mumu liaka Yoano anakapapachisa Yesu?

Ewa, Yoano kachilinga mumu Yesu keza ni kwita kuli iye hanga amupapachise. Yoano te kakupapachisa atu waze te akuzanga kusolola ngwo ayo kalikonekena ku yuma yipi yize te akulinga. Shina Yesu neye te kanazanga kulikonekena ku umwe upi uze anakalinga? Ka, Yesu kakalingile upi niumwe, mumu iye kali Mwana wa Zambi wa mu malilu. Alioze, iye kanaketa kuli Yoano hanga amupapachise ha chimwe chitela cheka. Tutalenu chitela chacho.

Muze te Yesu kanda achiza kuli Yoano, iye te kapwile karpinderu. Karpinderu kali umwe mutu yoze wakulinga yuma ya mapaya, ngwe meza ni yitwamo nawa ni tupasa. Lunga lia Maria Yosefwe te karpinderu, nawa iye yalongesa mulimo wacho kuli Yesu. Alioze, Yehova kakatumine mwanenyi hano hashi hanga apwe karpinderu. Yehova te kanazange ngwo iye alinge umwe mulimo upema, nawa te mashimbu haheta kulu hanga Yesu aputuke mulimo wacho. Mba asolole ngwo haliapwila iye keza hanga alinge upale wa Tato, Yesu yeta kuli Yoano hanga amupapachise. Shina Zambi kanakachizanga nyi?

Ewa, iye kanakachizanga, mumu, muze te Yesu machitutuka mu meya, limwe liji yilituhuka mu malilu yiliamba ngwo: ‘Yono mwe Mwanami, yoze yami nakuzanga chinji.’ Nawa malilu yazuluka yimuhulumuka umwe liembe yeza hali Yesu. Mba alioze te hi liembe ko wamwenemwene. Alioze yasoloka ngwe umwe liembe. Chamwenemwene te spiritu yisandu ya Zambi.

Yesu kapwile ni yuma yinji yakunyonga, kashika iye yaya ku chimwe chihela chahola, yalingako 40 a matangwa. Kwenako mba Satana yeza kuli iye. Satana yeseka Yesu katatu keswe hanga ehuke ku shimbi ja Zambi. Alioze Yesu kakachilingile.

Mba kulutwe lia yino yuma, Yesu yahiluka nawa yanyingika amwe malunga, waze anakapwa tumbaji twenyi atangu hanji akwa kumukaula. Amwe a kuli ayo majina jo te Andeleu, Petulu (nawa kakumuvuluka ngwo Semone), Fwilipe ni Natanele (nawa kakumuvuluka ngwo Mbatolomeu). Yesu ni tumbaji wano aha yijiya ku mbonge ya Ngalileya. Mu Ngalileya ayo yatwama mu limbo lia Natanele mu Kanana. Kwenako Yesu mba yaya ku chimwe chiwanyino cha umbachiso, yalinga chikomokeso chenyi chitangu. Yena unanyingika yika alingile? Iye yalumuna meya yapwa vinyu.