INAI tau ena kwarana dekenai ia diho mai noho pune manu mani oi itaia. Inai tau be Iesu. Hari iena mauri lagani be 30 bamona. Bona ia danu ia noho tauna be Ioane. Iena sivarai sisina ita dibaia vadaeni. Oi laloatao, a? Maria be ena varavara Elisabeta ia vadivadi henia neganai, Elisabeta ena bogana lalonai ia noho merona be mai moale danu ia roho. Unai mero be Ioane. To hari Ioane bona Iesu be dahaka idia karaia noho?

Ioane ese Iesu be Ioridane Sinavaina ena ranu lalonai ia hadihoa. Unai dala amo ta idia bapatisoa. Gau ginigunana be, ranu henunai idia hadihoa, bena idia abia isi lou. Ioane be taunimanima dekenai unai bamona ia karaia dainai, ia idia gwauraia Ioane Bapatiso. To dahaka dainai Ioane ese Iesu ia bapatisoa?

Ioane ese Iesu ia bapatisoa badina Iesu ese ia noia unai ia karaia totona. Ioane ese edia kara dika dainai idia sori taudia ia bapatiso henidia. To Iesu be nega ta ia kara dika dainai ia sori, a? Lasi, Iesu be kara dika ta ia karaia lasi, badina ia be Dirava ena Natuna guba amo. Unai dainai Ioane ese ia bapatisoa ena badina be idau. Mani unai badina ita itaia.

Iesu be Ioane dekenai ia do mai lasi neganai, ia be kapenta tauna. Kapenta tauna be au amo gau idauidau ia karaia, hegeregere teibolo, sea bona pata. Maria ena adavana Iosepa be kapenta tauna, bona unai gaukara be Iesu dekenai ia hadibaia danu. To Iehova ese ena Natuna be tanobada dekenai ia siaia lasi kapenta gaukarana ia karaia totona. Ma gaukara badana ta ia noho, bona Iesu ese ia karaia negana ia ginidae vadaeni. Ia ura ia hahedinaraia Dirava ena ura karaia totona ia mai, unai dainai, Iesu ese Ioane ia noia ia bapatiso henia totona. Unai kara dekenai Dirava ia moale, a?

Oibe ia moale, badina Iesu be ranu amo ia daekau murinai, guba amo gado ta ia hereva: ‘Inai be lauegu Natuna. Ia dekenai lau moale bada.’ Danu, toana be hegeregere guba ia kehoa bona inai pune manu be Iesu dekenai ia diho. To ia be pune manu korikorina lasi. Ia be Dirava ena lauma helaga.

Hari Iesu be gau momo ia laloa, unai dainai taunimanima idia noho lasi gabuna ta dekenai ia lao, bona unuseniai dina 40 ia noho. Unuseniai Satani be ia dekenai ia mai. Nega toi Iesu ia tohoa Dirava ena taravatu ia utua totona. To Iesu ese ia karaia lasi.

Unai murinai, Iesu ia giroa bona ia murinai idia raka taudia, eiava hahediba taudia haida ia hedavari henidia. Idia haida edia ladana be Andrea, Petero (eiava Simona), Filipo bona Natanaela (eiava Batolomeo). Iesu bona unai hahediba taudia matamatadia be Galilea dekenai idia lao. Galilea ai Natanaela ena hanua Kana dekenai idia ginidae. Unuseniai Iesu be headava aria badana ta dekenai ia lao, bona ena hoa karana ginigunana ia karaia. Unai hoa karana oi diba, a? Ranu be uaina ai ia halaoa.