KITAEM ti kalapati a bumabbaba iti ulo ti lalaki. Ti lalaki ket isu ni Jesus. Isut’ agangay 30 ti tawennan. Ket ti lalaki a kaduana isu ni Juan. Ammom kadi no asino ni Juan? Isut’ anak ni Elisabet. Isu daydiay limmagto gaput’ rag-o uray pay sakbay a naiyanak, idi ni Maria simmarungkar ken Elisabet.

Kaibatbatok ni Juan idiay Karayan Jordan ni Jesus. Kastoy ti pannakabautisar ti maysa a tao. Umuna, isut’ maipabatok iti danum, santo mairukuas manen. Daytoy ti ar-aramiden ni Juan kadagiti tattao, isu a napanaganan Juan Bautista. Ngem apay a ni Juan binautisaranna ni Jesus?

Ni Jesus napan ken Juan ket indawatna a mabautisaran. Babautisaran ni Juan dagiti tattao a kayatda a maipakita a maladingitanda kadagiti dakes a naar-aramidanda. Ngem awan dakes a naaramidan ni Jesus. Isu nga apay a kayatna ti mabautisaran?

Sakbay nga immay ni Jesus ditoy ken ni Juan, isut’ karpentero, kas iti asawa ni Maria, a ni Jose. Ngem adda naisangsangayan a trabaho a paaramid ti Dios ken Jesus. Tapno maipakitana nga immayen tapno aramidenna ti pagayatan ni Amana, indawat ni Jesus ken ni Juan a bautisaranna koma.

Naay-ayo ti Dios iti daytoy. Idi rimmuaren ni Jesus iti danum, maysa a timek manipud langit kunana: ‘Daytoy ti Anakko, a pakaay-ayuak unay.’ Kasta met, kasla naglukat ti langit ket daytoy a kalapati bimmaba ken Jesus. Daytat’ saan a pudpudno a kalapati. Kaas-asping laeng ti maysa. Talaga a daytat’ nasantuan nga espiritu ti Dios.

Itan adun ti pagpanunotan ni Jesus. Isut’ napan iti naiputputong a lugar iti 40 nga al-aldaw. Namitlo a daras, ni Satanas pinadpadasna a paaramid ken Jesus ti banag a maibusor iti linlinteg ti Dios, ngem madi nga aramiden ni Jesus dayta.

Kalpasan dayta, ni Jesus nagsubli ket nakitana ti dadduma a lallaki nga isudanto ti agbalin nga umun-una a paspasurotna, wenno ad-adalanna. Ti nagan dagiti dadduma ket isuda da Andres, Pedro (a maaw-awagan met ti Simon), Felipe ken Natanael (a maaw-agawan met ti Bartolome). Ni Jesus ken dagitoy baro nga ad-adalan napandan idiay distrito ti Galilea. Idiay Cana, napan ni Jesus iti dakkel a pagbodaan, ket inaramidna ti damdamo a milagrona. Ammom kadi daydiay? Pinagbalinna daydiay danum nga arak.