MA NAKAANAW ani li winq wank jun li mukuy saʼ xbʼeen li xjolom? Li winq aʼan li Jesus. Li Jesus wank tana 30 chihabʼ re. Ut laj Juan wank rikʼin li Jesus. Ma jultik aawe naq li xkʼuulaʼal li xʼElisabet, li wank saʼ xsaʼ, kiʼeekʼank xbʼaan xsahil xchʼool naq li xMaria kiwulak saʼ rochochebʼ? Li kʼuulaʼal aʼan laj Juan. Anaqwan, kʼaru yookebʼ xbʼaanunkil laj Juan ut li Jesus?

Laj Juan kixsubʼ li Jesus saʼ li nimaʼ Jordan ut kixsubʼebʼ ajwiʼ saʼ haʼ, ebʼ li qas qiitzʼin. Chanru nasubʼeʼk saʼ haʼ junaq qas qiitzʼin? Nachʼikmank chixjunil li xtibʼel saʼ haʼ, chirix chik aʼan naʼisiik. Maawaʼ joʼ nekeʼxbʼaanu rehebʼ li kʼuulaʼal naq nekeʼkʼeheʼk haʼ saʼebʼ li xjolom. Li Santil Hu naxkʼabʼaʼi laj Juan choʼq aj kubʼsinel haʼ. Kʼaʼut naq laj Juan kixsubʼ li Jesus saʼ haʼ?

Li Jesus kixye re laj Juan naq tsubʼeʼq saʼ haʼ. Laj Juan kixsubʼeʼbʼ saʼ haʼ ebʼ li qas qiitzʼin re xkʼutbʼesinkil naq keʼyotʼeʼk xchʼool xbʼaanebʼ li xmaak. Abʼan, ma wank xmaak li Jesus naq kisubʼeʼk saʼ haʼ? Inkʼaʼ! Li Jesus, Ralal li Yos, joʼkan naq maakʼaʼ xmaak. Kʼaru xyaalal naq kisubʼeʼk saʼ haʼ li Jesus?

Li Jesus yook chi kʼanjelak choʼq aj peechʼ naq toj maajiʼ naxsubʼ ribʼ saʼ haʼ. Jun laj peechʼ naxyiibʼ meex, tem malaj chunlebʼaal. Laj Jose aj peechʼ ut kixkʼut li kʼanjel aʼin chiru li Jesus. Naq li Jesus kichalk saʼ Ruuchichʼochʼ, maawaʼ re kʼanjelak choʼq aj peechʼ. Xbʼaan naq li Yos ak kixtenebʼ jun li nimla kʼanjel saʼ xbʼeen ut naq kiwulak xhoonal xbʼaanunkil li Rajom li xYuwaʼ, kixye re laj Juan naq tsubʼeʼq saʼ haʼ. Ma kiwulak chiru li Yos naq kisubʼeʼk saʼ haʼ li Jesus?

Naq li Jesus kiʼelk chaq saʼ haʼ, kiʼelk chaq saʼ choxa jun xyaabʼ kuxej ut kixye: ‹Aʼin li walal, li nasahobʼresink re inchʼool›. Tojaʼ naq, kixte ribʼ li choxa ut chanchan jun li mukuy kikubʼeek saʼ xbʼeen li xjolom li Jesus. Aʼan li xsantil musiqʼej li Yos.

Tojaʼ naq li Jesus xko chi kʼoxlak chiru 40 kutan saʼ li chaqichʼochʼ. Aran wank li Jesus naq laj Tza kixyal rix oxibʼ sut, re naq tixqʼet li xchaqʼrabʼ li Yos. Abʼan li Jesus inkʼaʼ kiʼabʼink chiru.

Chirix chik aʼan, li Jesus kixnaw ruhebʼ li xbʼeen xtzolom; laj Andres, laj Pedro malaj Simon, laj Felipe, laj Natanael malaj Bartolomeo. Li Jesus ut ebʼ li xtzolom aʼin, kohebʼ saʼ xteepal Galilea ut keʼkanaak saʼ li xtenamit laj Natanael aran Cana. Saʼ li tenamit aʼin kiwank jun li sumlaak, aran naq li Jesus kixsuqʼisi choʼq bʼiin li haʼ, li wank saʼebʼ li kukbʼ. Aʼin li xbʼeen sachbʼachʼoolej kixbʼaanu li Jesus.