BENO kemona diyembe kekulumuka na ntu ya Yezu? Yandi ke na bamvula kiteso ya 30. Muntu yai kele na Yezu kele Yoani. Beto melonguka dezia mambu ya metadila yandi. Beno kezaba dyaka mambu kulutaka ntangu Maria kumaka na nzo ya Elizabeti? Mwana ya vandaka na divumu ya Elizabeti kunikanaka na kyese. Mwana yango vandaka Yoani. Kansi Yoani na Yezu kesala nki awa?

Yoani mekatuka na kukotisa Yezu na Masa ya Yurdani. Mbotika kepesamaka mutindu yina. Bau kekotisaka muntu ya mvimba na masa mpi bau kesadisaka yandi na kubasika na masa. Sambu Yoani vandaka kusala mutindu yina, yau yina bantu bingaka yandi Yoani Mbotiki. Kansi sambu na nki yandi botikaka Yezu?

Yau kele sambu Yezu kwendaka na Yoani mpi lombaka yandi na kubotika yandi. Yoani vandaka kubotika bantu yonso yina vandaka kumonisa nde bau vandaka kumona mpasi ya mambu na bau ya mbi. Kansi Yezu? Keti yandi salaka kima mosi ya mbi yina vandaka kumonisa ntima na yandi mpasi? Ikele ve, sambu yandi vandaka Mwana ya Nzambi. Ata mutindu yina, yandi lombaka nde Yoani kubotika yandi sambu na kikuma yankaka. Inki vandaka kikuma yango?

Na ntwala ya kukwisa na Yoani, Yezu vandaka musadi mabaya. Joseph, bakala ya Maria, kuvandaka musadi mabaya ebuna yandi longaka mpi Yezu kisalu yina. Kansi Jéhovah kutindaka ve Mwana na yandi awa na ntoto sambu na kusala mabaya. Yandi fwete sala kisalu mosi ya mfunu. Ntangu kumaka sambu na kuyantika kisalu yina. Tala sambu na nki Yezu kwisaka na Yoani sambu na kubotika yandi mpi na kusonga bantu yonso nde yandi keyantika na kulungisa luzolo ya Tata na yandi. Keti yau yangidisaka Nzambi?

Mambu yina yangidikaka Nzambi sambu ntangu Yezu basikaka na masa ndinga mosi wakanaka na zulu mpi tubaka nde: ‘Tala Mwana na mono ya mono mendima.’ Zulu salaka bonso yau kekanguka mpi diyembe mosi kulumukaka na ntu ya Yezu. Yau vandaka diyembe kibeni ve, kansi mpeve santu ya Nzambi kulumukaka bonso diyembe.

Yezu vandaka na mambu mingi ya kuyindula, yau yina yandi kwendaka kudivandila yandi mosi ntama na nseke bilumbu 40. Kuna, Satana finamaka na yandi. Mbala tatu, yandi yunsaka yandi na kukolama na nsiku ya Nzambi, kansi yandi nungaka ve.

Na nima ya mambu yina, Yezu vutukaka mpi kutanaka na bantu yankaka bayina kumaka bantumwa, to balongoki na yandi ya ntete. Bazina na bau vandaka André, Pierre (ya bau vandaka kubinga mpi Simon), Filipe na Nathanaël (yina bingamaka mpi Barthélemy). Yezu na balongoki na yandi ya ntete kwendaka na Galilée. Bau vandaka fyoti na Kana, mbanza ya Nathanaël. Nkinsi ya makwela vandaka kisika yina. Yezu kwendaka na nkinsi yina ya makwela, mpi yandi salaka kidimbu na yandi ya ntete ya nkumbwa, na kubalulaka masa na vinu.