LUK di bɔd we de kam dɔŋ na dis man in ed. Dɛn kɔl dis bɔd ya dɔv. Di man na Jizɔs. I dɔn ol lɛk 30 ia so. Ɛn di ɔda man we de nia am na Jɔn. Wi bin dɔn lan smɔl tin bɔt Jɔn. Yu mɛmba we Meri go fɛn wan in fambul we nem Ilizabɛt, ɛn we di pikin na Ilizabɛt in bɛlɛ jomp? Na Jɔn na bin da pikin de. Bɔt wetin Jɔn ɛn Jizɔs de du naw?

Jɔn jɔs dɔn baptayz Jizɔs na Riva Jɔdan. Aw dɛn de baptayz pɔsin? Dɛn kin put di pɔsin insay di wata, dɔn dɛn es am ɔp. Na dis Jɔn kin du to pipul dɛn, so dɛn de kɔl am Jɔn we de baptayz. Bɔt wetin mek Jɔn baptayz Jizɔs?

Jɔn baptayz Jizɔs bikɔs na Jizɔs tɛl am fɔ baptayz am. Jɔn de baptayz pipul dɛn bikɔs di pipul dɛn want sho se dɛn fil bad fɔ di bad tin dɛn we dɛn dɔn du. Bɔt Jizɔs bin ɛva du ɛni bad tin? Nɔ, Jizɔs nɔ ɛva du bad tin, bikɔs in na Gɔd in pikin we kɔmɔt na ɛvin. So na ɔda tin mek i tɛl Jɔn fɔ baptayz am. Lɛ wi si wetin mek.

Jizɔs na bin kapɛnta bifo Jɔn baptayz am. Meri in man we na Josɛf na bin kapɛnta, ɛn na in lan Jizɔs kapɛnta wok. Bɔt Jiova nɔ bin sɛn in Pikin na di wɔl fɔ kam bi kapɛnta. I sɛn am fɔ kam du wan spɛshal wok, ɛn di tɛm bin dɔn rich fɔ mek Jizɔs bigin dis wok. So Jizɔs tɛl Jɔn fɔ baptayz am fɔ sho se i de kam bigin du di wok we in papa sɛn am fɔ kam du. Yu fil se Gɔd bin gladi fɔ dis kayn tin we Jizɔs du?

Yɛs, i bin gladi. Na dat mek we Jizɔs kɔmɔt insay di wata, vɔys kɔmɔt na ɛvin we se: ‘Dis na mi Pikin, a gladi fɔ am.’ Dɔn i tan lɛk se di ɛvin opin ɛn dis dɔv kam pan Jizɔs. Bɔt nɔto tru tru dɔv dis. Na fiba i fiba dɔv. Na Gɔd in oli spirit.

Jizɔs gɛt plɛnti tin fɔ tink bɔt naw, so i go de fɔ 40 dez na wan ples we nɔbɔdi nɔ de. Setan go mit am de. I tray tri tɛm fɔ mek Jizɔs du tin dɛn we Gɔd nɔ want. Bɔt Jizɔs nɔ du am.

Afta dat, Jizɔs kam mit sɔm man dɛn we bi in disaypul dɛn. Sɔm pan dɛn nem dɛn na Andru, Pita (we dɛn kin kɔl Saymɔn), Filip, ɛn Nataniɛl (we dɛn kin kɔl Batalomi). Jizɔs ɛn dɛn in nyu disaypul ya go na Galili. We dɛn de na Galili, dɛn go na di tɔŋ usay Nataniɛl bɔn, we dɛn de kɔl Kena. Na Kena Jizɔs bin de we i go na wan big mared pati. Na dis mared pati ya i du in fɔs mirekul. Yu no us mirekul i du? I tɔn wata to wayn.