TO MONO nkutji ozo zina kuhegumukira pomutwe gomugara. Mugara ogu kuna kara Jesus. Ngesi age kuna siki ponomvhura dokusika po-30. Ano mugara ogu ana sikama nage kuna kara Johanesa. Nare twa lironga ko yokumuhamena. To diworoka apa Mariya ga zire a ka dingure ekoro lyendi Elisabeta, ano munona ogu ga kere monda zaElisabeta ta vatauka koruhafo? Munona gwina va dilire simpe kuhampuruka kwa kere Johanesa. Nye yinke vana kurugana ngesi oJohanesa naJesus?

Johanesa ntani tupu ana kumana kudivida Jesus momema gomukuro gwaJorodana. Ngesi yimo ava kuhu muntu. Pomuhowo kumudivida konhi zomema, ntani kumufumbura hena. Johanesa ngava mu tumbura asi Johanesa Mukuhwi morwa eyi yiyo nga rugana kovantu. Nye morwasinke Johanesa ga kuhwilire Jesus?

Johanesa kwa yi ruganene morwa Jesus kwa wizire nokupura Johanesa a mu kuhwe. Johanesa nga kuhu vantu ava va here kulikida asi awo kuna kulivera koyininke yoyidona eyi va rugana. Nye Jesus koyili eyi ga rugene ga hepere kulivera ndi? Hawe, Jesus kwato eyi ga rugene yokulivera, morwa age MunwaKarunga mwene gokutunda meguru. Age kwa pulire Johanesa a mu kuhwire konda nazopeke. Tu tareni asi konda musinke za kere.

Komeho Jesus a wize kwaJohanesa, age kwa kere muhongi. Muhongi kuna kara muntu ogu a hongo yininke yoyitji, ngwendi yitafura noyipundi. Mugara gwaMariya, Josefa, kwa kere muhongi, yiyo ga rongere Jesus nage a kare gumwe. Nye Jehova kapi ga tumine Munwendi pevhu a ya kare muhongi. Age kuna kara noyirugana yoyiwa eyi ga hepere kuyarugana, ano siruwo sina siki mo yipo Jesus a tameke kuyirugana. Mokulikida asi ngesi ana wiza nye a ya rugane eharo lyaGuhwe, Jesus ta pura Johanesa a mu kuhwe. Karunga ana yi hafere eyi ndi?

Yimo, ana yi hafere, morwa konyima zapa Jesus ana tundu momema, ezwi lyokutunda meguru tali tanta asi: ‘Ogu yige Munwange ogu na hara.’ Ntani hena, tayi moneka asi eguru tali zeguruka ano ezi nkutji tazi hegumukire Jesus. Nye azo kapisi nkutji nawa-nawa. Azo kwa fana tupu ngwendi nkutji. Nye zene-zene ko kuna kara mpepo zaKarunga zokupongoka.

Ngesi Jesus ana kara nomagano gomanzi, makura ta zi kevango lya hana vantu mazuva 40. Okwina Satana ta mu wizire. Satana ta heteke Jesus yikando yitatu asi a rugane yokulilimba nompango zaKarunga. Nye Jesus kapi ga yi rugene.

Konyima zeyi, Jesus ta tengura nokugwanekera novagara vamwe ava vana kara vasikuli ndi varongwa vendi womuhowo. Madina gawo gamwe kuna kara Andiliyasa naPeturusa (ogu ngava tumbura hena asi Simoni), naFilipusa ntani naNatanayera (ogu ngava tumbura hena asi Baratoromeusa). Jesus novarongwa wovape ava tava katuka va ze koGalireya. MoGalireya omo tava piti modoropa ezi ga tundilira Natanayera zedina Kana. Omwina Jesus ta zi kosipito sosinene sononkwara nokukarugana sitetu sendi sokuhova. Ono diva asi sangapi? Age ta pirura mema ga kare vhinyu.

Mateusa 3:13-17; 4:1-11; 13:55; Marukusa 6:3; Johanesa 1:29-51; 2:1-12.