TALA eyembe dikulumukanga vana ntu a muntu. Muntu ndioyo i Yesu. Owau una ye kimbuta kia mvu 30. O muntu vana ndambu andi i Yoane. Tuawidi kala e diambu mu kuma kiandi. Nga osungamene vava Maria kakingula Elisabete? Mwana muna vumu kia Elisabete watimuka ye kiese. Mwana ndioyo i Yoane. Kansi, o Yoane yo Yesu nki bevanganga ovava?

O Yoane odimwini Yesu muna nsi a maza ma Nkoko a Yodani. I wau kevubilwanga o muntu. Entete, odimunwanga muna nsi a maza, i bosi otombolwanga. Wau vo i wau kavanganga o Yoane kwa wantu, wayikilwanga vo Yoane wa Mvubi. Kansi, ekuma Yoane kavubila Yesu?

Kadi Yesu wayiza kwa yandi yo kunlomba vo kamvuba. O Yoane wavubanga wantu ana bavilukanga o ntima muna mambi mau. Kansi, nkia mbi kavanga o Yesu muna viluka o ntima? Ve, o Yesu kasidi vanga mbi ko, kadi Mwan’a Nzambi, kun’ezulu katuka. Ozevo, walomba kwa Yoane mu kumvuba mu kuma kiakaka. Yambula twazaya e kuma kiaki.

Una kayizidi ko kwa Yoane, o Yesu mvadi-anti kakala. Mvadi-anti i muntu osalanga salanganu ya mabaya, nze meza ye kunda. O Yosefe wa nkaz’a Maria, mvadi-anti kakala, walonga Yesu e salu kiaki. Kansi, o Yave kafila mwan’andi ova ntoto mu kala se mvadi-anti ko. Salu kiamfunu kamvana mu sala. E ntangwa yafwana kimana Yesu kayantika e salu kiaki. Ozevo, muna songa vo wayiza mu vanga luzolo lwa S’andi, o Yesu walomba kwa Yoane vo kamvuba. Nga diadi diayangidika Nzambi?

Elo, dianyangidika, kadi vava Yesu katomboka muna maza ndinga itukidi kun’ezulu, oku vo: “Ndioyu i Mwan’ame anzolwa, ona nyangalelanga.” Ezulu mpe diziukìdi, eyembe dikulumukini vana ntu a Yesu. Dikedi nze eyembe, kansi ke yembe ko. I mwand’avelela a Nzambi.

Owau, Yesu wakala ye mayingi muna badika. Ikuma, wele vana fulu kia yandi kaka lumbu 40. I bosi, o Satana wizidi kuntonta. Untontele nkumbu ntatu, wavava fila Yesu mu kulula nsiku mia Nzambi. Kansi, o Yesu kavanga wo ko.

I bosi, o Yesu ovutukidi, ozeye wantu akaka ana bakituka alandi yovo alongoki andi antete. E nkumbu za akaka muna yau i zazi: Andere, Petelo (wayikilwanga mpe vo Simone), Filipo ye Natanaele (wayikilwanga mpe vo Batolomai). O Yesu ye alongoki awaya bayenda kuna Ngalili. Kuna Ngalili baningama muna mbanz’a Kana ina kawutukila Natanaele. O Yesu wele ku nkinzi a longo, ovangidi esivi diandi diantete. Nga ozeye esivi kavanga? Wakitula maza se vinyo.