KIʼNXE, mo kaʼyinxa, palom chʼinxtl tkubʼuʼl (tkʼuʼl) toj twiʼ xjal. Aju xjal lu atzun Jesúsjo. Chʼixmelo 30 abʼqʼi iqʼen tuʼn jaʼle. Atzenju at tukʼe atzun Juanjo. O tzʼelxi chʼin qnikʼ tiʼj Juan. ¿Naʼnx tuʼna tej t-xiʼ María tukʼe Elisabet, aju at t-xilen tukʼe, ex tej tjaw yukchi tal neʼ toj tkʼuʼj Elisabet? Aju neʼẍ lu ateqtzun Juanju. ¿Tiʼ nbʼent tuʼn Juan ex Jesús jaʼle?

Tzma xkux tqʼoʼn Juan Jesús toj nimaʼ Jordán. Iktzun njaw aʼ kywiʼ xjal. Tnejil nchi kux qʼoʼn xjal tuj aʼ ex nchi jatz qʼiʼntl. Ik nbʼentju tuʼn Juan kyukʼe xjal; tuʼntzunju nok tbʼi te Juan el Bautizante. ¿Tiquʼn xkux tqʼoʼn Juan Jesús tuj aʼ?

Bʼant jlu tuʼn Juan, tuʼnjo ul Jesús tukʼe ex xi tqʼamaʼn te tuʼn tjaw aʼ twiʼ. Nchi kux tqʼoʼntaq Juan xjal toj aʼ aqeju kyajtaq tuʼn tkubʼ kyyekʼin qa otaq tzʼajtz tiʼj kyanmi tuʼn miʼn tkubʼ kybʼinchentl mya bʼaʼn. ¿Kubʼpetzulo tbʼinchaʼn te Jesús jun mya bʼaʼn tuʼn tanjtz tiʼj tanmi? Mixtiʼ te Jesús bʼant jun mya bʼaʼn tuʼn, quʼn tKʼwaʼl qMan Dios te aju tzajni toj kyaʼj. Kyjuʼtzun, at juntl tiquʼn xi tqʼamaʼn te Juan tuʼn tjaw aʼ twiʼ. Qo xnaqʼtzal tiʼj tiquʼn.

Tej naʼmxtaq tul Jesús tukʼe Juan, jun karpintertaq. Aju jun karpinter bʼinchel tzʼlam tuʼn kyok te mes (meẍ), qʼuqbʼil ex txqantl. Karpintertoq te José, aju tchmil María, a kubʼ xnaqʼtzante Jesús tuʼn tok te karpinter. Atzunte Dios mitiʼ tzaj tsamaʼn tKʼwal twitz Txʼotxʼ tuʼn tok te karpinter. Atteq jun taqʼen aju nimtaq toklen, ex otaq pon ambʼil tuʼn t-xi tzyet taqʼun lu. Tuʼntzunju, tuʼn tkubʼ tyekʼen Jesús qa otaq tzul bʼinchal te aju tajbʼil tMan, xi tqʼamaʼn te Juan tuʼn tkux tqʼoʼn tuj aʼ tuʼn tjaw aʼ twiʼ. ¿Tbʼanelpetzele ela jlu toj twitz Dios?

Tbʼanel ela toj twitz, quʼn tej tjatz Jesús tuj aʼ, tzaj qʼajt Dios tuj kyaʼj ex tma: ‹Atzun nKʼwaʼle jlu kʼujlaʼnxix wuʼne, in chin tzalaje tiʼj›. Ax ikx, jaqetlo kyaʼj ex kuʼtz aju palom lu tibʼaj Jesús. Nya jun palomxix te jlu, quʼn naq jun techil t-xew Dios jlu.

Tej tbʼaj jlu, atteq nim tiʼchaq tuʼn t-ximin Jesús tiʼj, kyjuʼtzun xiʼ 40 qʼij toj jun tembʼil jatumel mitiʼtaq xjal tuj. Pon Satanás jatumel taʼtoq Jesús. Oxe maj kubʼ tqʼoʼn Satanás tiʼchaq twitz Jesús tuʼn miʼ kyokx tbʼiʼn tkawbʼil Dios. Mitiʼ kubʼ tzʼaq Jesús tuʼn jlu.

Tbʼaj jlu, meltzʼaj Jesús ex ok tojtzqiʼn junjun xinaq aqeju e ok lepe tiʼj tnejilku. A kybʼi junjun jlu: Andrés, Pedro (ax juntl tbʼijo Simón), Felipe ex Natanael (ax ikx Bartolomé tbʼi). Xiʼ Jesús kyukʼex qe jlu toj Galilea. E weʼ tuj ttnam Natanael, aju Caná tbʼi, atz jatumel kubʼ tbʼinchaʼn Jesús tnejil milagro, tej tzmataq nchi kubʼ mojeʼ kabʼe xjal. ¿Ojtzqiʼn tuʼna alkye milagro kubʼ tbʼinchan? Aju ok aʼ tuʼn te vino.