OK IXË tadë pak diˈib yam kyukaageˈkypyë tyäˈädë yetyëjk. Tyäˈädë yetyëjk yëˈë Jesús. Ja tyamë jyëmëjt tmëdaty naa 30. Ets yëˈë yam mëdë Fwank. Tyäˈädë Fwank të yˈokˈyajmaytyakpë. ¿Mjamyejtsypy ko ja Mariiʉ ojts tkuˈixy ja myëguˈuk Elisabet netpë ja Elisabetë yˈuˈunk ojts yiˈxy mëdë xondakënë? Tadë uˈunk diˈibë nety kyajnëm myaxuˈunkˈaty yëˈë Fwank. Per ¿ti net yam tyuundëbë Fwank mëdë Jesús?

Fwank tam tim yajnëpaˈtstäˈäyë Jesús mä ja Jordán mëj nëë. Dëˈënën tuˈugë jäˈäy nyëbety, nyipeˈetsy mä nëë ets ta net yajjuuty. Fwank dëˈën dyajnëbetyë jäˈäy, pääty yajtijy Fwank Yajnëbajtpë. Per ¿tiko dyajnëbejtyë Jesús?

Wenë Fwank ojts dyajnëbetyë Jesús yëˈko yëˈë ojts yˈanëˈëmxëty ets yajnëbatëdët. Fwank yëˈë nety yajnëbejtypyë jäˈäy diˈib jyäˈäp ko të pyoky tyuny. Per ¿waˈandaa Jesús ti ttundëgoojy diˈib myëkjäˈäjë? Kyaj, Jesús kyaj ti ttundëgoojy, yëˈko yëˈë Diosë yˈUˈunk diˈib tsoˈon tsäjpotm. Pääty min nˈokˈijxëm tidën ko Jesús tˈanmääyë Fwank ets yajnëbatëdët.

Mä nety kyanëbetynyëmë Jesús yëˈë nety tyuunkˈäjtypyë tsajts jëˈtk. Tuˈugë tsajtspë yëˈë yaˈoˈoyëbë meesë, siyë etsë bankë. Josee ja nyaˈayë Mariiʉ tsajtspë nety, ets yëˈë nandëˈën tyukniˈijxë Jesús. Perë Dios kyaj tkejxyë yˈUˈunk yä Naxwiiny ets tyunët tsajtspë. Yëˈë tyuknigajx ets ttunët tuˈugë tuungë jëjpˈambë. Pääty ko jyajty ja tiempë ta tˈanmääyë Fwank ets yajnëbatëdët, ets dëˈën dyaˈixëdët ko yëˈë të myiny ets ttunanë Tyeetyë tsyojkënë. ¿Yˈagupëjkëdaa Dios ko Jesús nyëbejty?

Yˈagupëjk, pes ko ja Jesús pyëtseemy nëjoty net tuˈugë ayuk yajmëdoojy tsäjpotm diˈib jënäämp: Tyäˈädëtsë dëˈënë nˈUˈunk diˈibëts njantsy tyukjotkëdakypy. Ta ja tsäjp yaˈijxy extëm yˈawäˈätsy, ets ta ja Jesús nyigëdakë tuˈugë pak, per kyaj jyantsy yëˈëjëty tuˈugë pak. Yëˈë Diosë myëjää diˈib nigëdakë.

Ja Jesús mayë nety tijatyëty twinmayaˈany, pääty ojts nyejxy mä tuˈugë lugäärë anaytyuˈuktuuybyë ets jam ojts yˈity 40 xyëë. Jamë Satanás nyimiinë, ets tëgëk ok ojts tjatsoky etsë Jesús tmëdëgoyëdë Diosë yˈanaˈamën. Perë Jesús kyaj tmëdëgoojy.

Ta ko Jesús ojts jyëmbijnë, ta tˈixyˈajty näägë yetyëjk diˈib ojts tˈëxpëjkpëˈaty. Ja txëˈäjttë: Andrés, Peedrʉ (diˈib nandëˈën yajtij Simonk), Felipʉ etsë Natanael (diˈib nandëˈën yajtij Bartolomee). Ta mëdë Jesús ojts nyëjxnëdë mä ja Galileeʉ yˈit lyugäär. Ta jam ojts wyëˈëmëdë mä ja käjpn diˈib xyëˈäjtypy Kanaa, mä Natanael kyugäjpnëty. Jam tamë nety tuˈugë jäˈäy pyeky ets jamë Jesús ojts ttuny ja tim jawyiimbë mëjˈäjtënë. ¿Mnijäˈäp ti tyuun? Yëˈë ja nëë yajjëmbijt binë.