KOTO tí sa̱ta tí va̱xi chí xi̱ní ta̱yóʼo. Ta̱yóʼo kúú ta̱ Jesús. Ta vitin 30 ku̱i̱ya̱ra. Ta̱ ndíka̱a̱ xíʼin ta̱ Jesús yóʼo kúú ta̱ Juan. Xa̱sa̱kuaʼa loʼoyó xa̱ʼa ta̱yóʼo. ¿Á ndákaʼún tá ni̱xa̱ʼa̱n ñá María xi̱toniʼniñá ñá Elisabet? Ta̱ loʼo ta̱ xi̱ndika̱a̱ ti̱xin ñá Elisabet iin ka̱nditara ña̱ ni̱kusi̱í-inira. Ta̱yóʼo xi̱kuu ta̱ Juan. Soo vitin ¿ndáaña kéʼé ta̱ Juan xíʼin ta̱ Jesús?

Ta̱ Juan iin ka̱tavi̱ nííra ta̱ Jesús ini yu̱ta Jordán. Saá kúú ña̱ ndákuchi iin na̱ yiví, siʼna chíka̱a̱ níínana ini ti̱kui̱í saá távánana. Ña̱yóʼo kúú ña̱ íxaa ta̱ Juan xíʼin na̱ yiví ña̱kán káʼa̱nna xíʼinra ta̱ Juan ta̱ Sákuchi na̱ yiví. Soo ¿ndachun sa̱kúchira ta̱ Jesús?

Saáchi mií ta̱ Jesús ki̱xi ni̱ka̱ʼa̱n xíʼinra ña̱ ná sákuchirara. Ta̱ Juan sákuchira na̱ yiví na̱ ndixa ndíkó-ini xa̱ʼa ña̱ kini kéʼéna. Soo ¿á ke̱ʼé ta̱ Jesús ña̱ kini? Ta̱ Jesús kǒo ña̱ kini níkeʼéra, chi Se̱ʼe Ndióxi̱va kúúra, chí ndiví ki̱xira. Xa̱ʼa inka ña̱ʼava kúú ña̱ sa̱kúchi ta̱ Juan ta̱ Jesús. Yóʼo sakuaʼayó ndáa xa̱ʼa kúúña.

Tá kúma̱níka kixi ta̱ Jesús nu̱ú ta̱ Juan, xi̱kachíñura xíʼin ta̱ José ña̱ xi̱keʼéna vi̱tu, tayi̱ xíʼin tú banco. Chi ta̱ José yií ñá María, ña̱yóʼo xi̱kuu chiñu ña̱ xi̱keʼéra ta sa̱náʼa̱ra ta̱ Jesús keʼéra ndiʼi ña̱yóʼo. Soo Ndióxi̱ kǒo níchindaʼára Se̱ʼera ña̱ keʼéra chiñu yóʼo. Íyo iin chiñu káʼnu va̱xira keʼéra nu̱ú Ndióxi̱, ta vitin ki̱xa̱a̱ tiempo ña̱ keʼéra chiñu yóʼo. Ña̱ va̱ʼa na̱ʼa̱ra ña̱ ndixa va̱xira keʼéra chiñu Yivára, ña̱kán ni̱ka̱ʼa̱nra xíʼin ta̱ Juan ña̱ ná sakuchirara. ¿Á kúsi̱í-ini Ndióxi̱ ña̱ nda̱kuchi ta̱ Jesús?

Kúsi̱íva-inira, chi tándi̱ʼi nda̱kuchi ta̱ Jesús, saá ni̱ka̱ʼa̱n iinna chí ndiví: ʼTa̱yóʼo kúú Se̱ʼi̱, ta̱ kúni̱níi̱ xínii̱ʼ. Tasaátu ni̱nu̱na chí ndiví, ta tí sa̱ta yóʼo va̱xirí chí xi̱ní ta̱ Jesús. Soo su̱ví sa̱ta ndixa kúúrí. Saá kuití náʼa̱varí. Ña̱ espíritu yi̱i̱ Ndióxi̱va kúúña.

Ta vitin íyo ku̱a̱ʼá ña̱ʼa ña̱ ndakanixi̱ní ta̱ Jesús xa̱ʼa, ña̱kán ke̱era ku̱a̱ʼa̱nra chí nu̱ú kǒo ni iin na̱ yiví ndóo, ta kán ni̱xi̱yora 40 ki̱vi̱. Ta ki̱xi ta̱ Ndi̱va̱ʼa nu̱úra. U̱ni̱ yichi̱ ndu̱kúra ña̱ sandáʼvira ta̱ Jesús ña̱ ko̱sokavara ley Ndióxi̱. Soo ta̱ Jesús kǒo níkeʼéra ña̱ kúni̱ ta̱ Ndi̱va̱ʼa.

Tándi̱ʼi ku̱u ña̱yóʼo, saá ndi̱kó ta̱ Jesús ta xi̱nitáʼanra xíʼin na̱ ni̱xa̱a̱ xi̱ndiku̱n sa̱tára á na̱ discípulora. Na̱yóʼo kúú savana: Ta̱ Andrés, ta̱ Pedro (inka ki̱vi̱ra kúú Simón), ta̱ Felipe xíʼin ta̱ Natanael (inka ki̱vi̱ra kúú Bartolomé). Ta vitin ke̱e ta̱ Jesús ku̱a̱ʼa̱nra xíʼin na̱yóʼo chí ñuu Galilea. Tasaá ni̱xa̱a̱na ñuu ta̱ Natanael ña̱ naní Caná, ta kán íyo iin vikó nu̱ú tíndaʼa̱na, ta nu̱ú íyo vikó yóʼo ke̱ʼé ta̱ Jesús iin milagro ña̱ nu̱ú. ¿Á xíni̱ún ndáa milagro kúú ña̱ ke̱ʼéra? Ti̱kui̱í nda̱sarará vino.