TALA livembe a li na ku suluka ha mutue ua ou yala. Ou yala ikeye Yesu. Na puisa miaka 30 vuovuno. Uze yala a li hamo neni ikeye Yoano. Tua lilongesele vimo vieni ku nima. Ua vuluka haze Maliya mua ile na ku meneka kavusoko keni Elizambeta, kaha uze kakeke ua kele muzimo a tumbuke na ndzolela? Uze kakeke ua puile Yoano tele kanda aci semuka. Vuno vika vali na ku linga aha va Yoano na Yesu?

Yoano vuovuno mua ci mbuitike Yesu mu Ndonga Yondau. Muntu ve ku mu mbatiza ngecize. Ca ku livanga ku mu mbuitika mu mema kaha ku mu zavulula. Eci cikeco cipanga ca kele na ku linga Yoano ku vantu ngeci va mu lukile nguavo Yoano mukua ku mbatiza. Omo lia vika Yoano ua mbatizile Yesu?

Yoano ua mu mbatizile, muomu Yesu ikeye uezile na ku mu vundila ngueni a mu mbatize. Yoano ua kele na ku mbatiza vaze va muesele ngecize va na alulukile ku vipi viavo. Vuno Yesu neni ua lingile vumo vupi linga aluluke ni? Houe, Yesu ka lingile vupi na vumo vuahi, muomu ua puile Muana Njambi ua ku fuma muilu. Vunoni ua ile kuli Yoano linga a mu mbatize omo lia vumo vutumbe. Tu ci tantekeye vutumbe vuaco.

Ntsimbu Yesu tele kanda a cize kuli Yoano, ua puile kalupindelo. Kalupindelo cipanga ceni ca pua ku songa vituamo na vimesa. Yala lia Maliya Yosefe ua puile kalupindelo kaha ua longesele Yesu cipanga caco. Vunoni Yehova ka tumine Muaneni linga a ku pue kalupindelo. Ua kele na cipanga ca seho ya kama kaha ntsimbu ya hetele linga Yesu a putuke cipanga caco. Linga a muese ngecize uezile mu ku linga cizango ca Ise, Yesu ua vundilile Yoano linga a mu mbatize. Vuno Njambi ca mu ile ku mutima, ni?

Eyo, muomu omo Yesu ua zavulukile mu mema, kuilu kua fumine lizi, ngualio: ‘Ou ikeye muanange i nja lema ua nji ya ku mutima’. Kaha lilu lia sokolekele kaha ou livembe ua sulukile hali Yesu. Vutuhu ua solokele ngue livembe, kati livembe mpundu. Ya puile sipilitu santu ya Njambi.

Vuovuno Yesu ua kele na via vingi via pandele ku singanieka, ngeci ua ile kua lika lieni mu matangua 40. Kaha Satana uezile linga a ku mu eseke. Satana uesekele Yesu linga a likele ku ononoka ku masiko a Njambi. Vunoni Yesu ka tavele.

Mu nima ya vize, Yesu ua hilukile kaha ua uanene vamo vamala ngeci ua va puisile vandongesi veni va katete. Mazina avo Anduleo, na Petulu (u va lukile naua nguavo Simone), Filipe na Natanele (u va lukile naua nguavo Mbatolomeo). Yesu na vandongesi veni va ile ku muhato ua Ngalileya. Mu va hetele ku Ngalileya, va tulile mu mbonge ya Kanana muimbo lia Natanele. Kaha kuze Yesu ua ile ku cilika ca vulo kaha ua lingileko cikomoueso ceni ca katete. Ua tantekeya cikomoueso cika ua lingile? Ua himpuile mema ku pua viniu.