Tanojnots 88

Juan kiauij Jesús

XIKITA uiltsin tein temoua itech itsontekoj nejin takat. Takat yejua Jesús. Axkan kipia kemej 30 xiujmej. Uan tein yetok iuan yejua Juan. Ika titajtojkajya tepitsin. ¿Tikelnamiki keman María kikalpanoto ichankauj Elisabet uan konet tein yetoya iijtik moolinij uan yolpakik? Nejon konet tein ayamo nemia katka Juan. Sayoj ika, ¿toni kichiuaj nikan Juan uan Jesús?

Juan yekin kipankalakij Jesús itech ueyiat Jordán. Ijkon kiauiaj aksa. Kipankalakiaj itech at uan kikixtiaj. Juan ijkon kinchiuaya taltikpakneminij; yejika kitokaytijkej Juan Taauijkej. Sayoj ika, ¿keyej kiauij Jesús?

Juan kichiuak porin Jesús kiajsito uan kiiluij maj kiauiani. Juan kinauiaya taltikpakneminij tein kinekiaj kinextiskej ika moyolkepayaj ika nochi tein amo kuali kichiuayaj. Sayoj ika, ¿kichiuak teisa Jesús uan yejika monekia moyolkepas? Amo, Jesús amo keman kichiuak nejon, porin katka iKoneuj Dios tein ualeuak iluikak. Sayoj ika, yetoya okse taman keyej kiiluij Juan maj kiauiani. Maj tikitakan keyej.

Achtopa keman Jesús kionajsiskia Juan, katka kuoujxijxinkej. Se kuoujxijxinkej kichijchiua teisa ika kuouit, kemej mesas, ikpalmej uejueyi uan tsikitsitsin. José, inamik María, katka kuoujxijxinkej uan no kinextilij Jesús. Sayoj ika Dios amo kiualtitanik iKoneuj nikan Taltikpak maj kuoujxijximaki. Ta kipialiaya se tekit tein motelnekia, uan ajsikaya tonal maj kipeualtiani. Yejika Jesús kiiluij Juan maj kiauiani uan ijkon kinextiskia ika kichiuako itanejnekilis iPopaj. ¿Kiyolpaktij Dios nejin?

Kemaj, ta satepan keman Jesús kisak itech at, iluikak mokakik se tajtolis tein kijtoj: ‘Yejua nejin noKoneuj, akin nechyolpaktia’. Uan no, iluikak kemej eskia motapoj uan se uiltsin pantemok itechkopa Jesús. Sayoj ika amo melauj katka se uiltsin. Ta sayoj ijkon tamatia. Tein melauj katka iyektikatsin espíritu Dios.

Satepan, Jesús tanemilij itech miak taman, yejika yajki taseltijkan 40 tonalmej. Ompa Satanás kiajsito. Uan expa kichiualtisnekia Jesús maj kitapanauiliani itanauatiluan Dios. Sayoj ika Jesús amo kichiuak.

Satepan keman Jesús kipanok nejon, mokepak uan kinixmatik seki takamej tein mochiujkej yekinika itatojtokakauan, oso imomachtijkauan. Yetoyaj Andrés, Pedro (tein no motokaytij Simón), Felipe uan Natanael (tein no motokaytij Bartolomé), uan oksekinok. Jesús uan nejin takamej, yajkej itech tal tein pouia Galilea. Uan mokaujkej, Caná, ialtepeuj Natanael, uan ompa, itech se nenamiktilis Jesús kichiuak yekinika mouiskatekit. ¿Tikmati toni? Kichiuak maj at mokepani tayil.

Mateo 3:13-17; 4:1-11; 13:55; Marcos 6:3; Juan 1:29-51; 2:1-12.