TLAPOUALISTLI 88

Juan okiapolakti Jesús

XIKITA paloma tlen ualtemoa ipan itsonteko nin tlakatl. Nin tlakatl ye Jesús. Axkan yikipia kanaj 30 xiuitl. Uan inauak kajki Juan. Yotimomachtijkej itlaj itech ye. ¿Tikilnamiki ijkuak María okitlajpaloto Elisabet, uan konetsintli tlen okatka ijtik Elisabet chikauak omolini pampa oyolpakik? Non konetsintli tlen ayamo onesiaya okatka Juan. Uan axkan, ¿tlen kichijtokej Juan uan Jesús?

Juan yikin okiapolakti Jesús ijtik aueyatl Jordán. Ijkon teapolaktia. Kiapolaktia itech atl uan satepan kikixtia. Juan non tlen okichiuaya, ik non, okitokayotiayaj Juan akin Teapolaktia. Maski ijkon, ¿tleka okiapolakti Jesús?

Juan ijkon okichi pampa Jesús okilui ma kiapolakti. Juan okinapolaktiaya tlaltikpaktlakamej tlen okinyolkokoayaj sekimej tlamantli tlen amo kuali okichijkej. Maski ijkon, ¿itlaj amo kuali okichi Jesús itech tlen omonekiaya moyolkuepas? Amo, Jesús amo keman okichi itlaj amo kuali, pampa ye iKone toTajtsin Dios tlen achto okatka itech iluikak. Ik non, onka okse tlamantli pampa okitlajtlanili Juan ma kiapolakti. Ma tikitakan tleka okiapolakti.

Achto ualaskia Jesús ixpan Juan, ye otekitiaya ken kuajxinki. Se kuajxinki kichijchiua miak tlamantli ika kuauitl, ken mesas, sillas uan bancos. José, inamik María, okatka kuajxinki, uan ye okimachti Jesús ma yeto kuajxinki. Maski ijkon, toTajtsin Dios amo okiualtitlanki iKone nikan ipan Tlaltikpak pampa yetoskia kuajxinki. ToTajtsin Dios kimakaskia se tekitl tlen miak ipati, uan yimonekia kichiuas. Ik non, pampa kiteititiskia ouala pampa kichiuaskia itlanekilis iTajtsin, Jesús okilui Juan ma kiapolakti. ¿Okipakti toTajtsin Dios tlen okichi?

Kema, pampa ijkuak Jesús okiski ijtik atl, se tlajtoli omokak itech iluikak tlen okijto: ‘Ye nin notlasojKone, akin inauak nipaki’. Noijki iluikak omotlapo uan nin paloma oualtemok ipan Jesús. Maski ijkon, amo melauak se paloma. San ijkon moita. Nin iespíritu toTajtsin Dios.

Axkan Jesús omonekiaya mokuayejyekos itech miak tlamantli, ik non, oyajki kanin amo akaj okatka uan ompa omoka 40 tonalmej. Ompa Satanás oyajki inauak. Eyijpa Satanás okinekiaya kichiualtis Jesús amo ma kitlakamati itlanauatiluan toTajtsin Dios. Maski ijkon, Jesús amo ijkon okichi.

Satepan ijkuak opanok non, Jesús omokuepki uan okinmixmatki sekimej tlakamej tlen omochijkej achto imachtijkauan. Sekimej itech yejuan okatkaj: Andrés, Pedro (akin noijki okitokayotiayaj Simón), Felipe uan Natanael. Jesús uan ninmej tlakamej okiskej pampa oyajkej itech Galilea. Ompa omokajkej itech ialtepetl Natanael, Caná, kanin omochijtoka se namiktilistli, uan ompa Jesús okichi iachto milagro. ¿Tikmati tlen okichi? Atl okikuepki vino.

Mateo 3:13-17; 4:1-11; 13:55; Marcos 6:3; Juan 1:29-51; 2:1-12.