Historia 88

Juan kiapolaktia Jesús

XKITA paloma tlen uajtemotiuj ipan itsontekon yejuin tlakatl. Kema, yejua Jesús. Aman ikipiya 30 xiuitl. Niman akin iuan nemi, itoka Juan. Yotomachtijkej itech yejua. ¿Tikilnamiki ijkuak María okitlajpaloto Elisabet, konetsintli akin nemiya ijtik Elisabet onouiyoni pampa melak pakiya? Yejuin konetsintli akin xitlakatiya katka Juan. San ika, aman ¿tlenon kichiuaj Jesús niman Juan?

Juan kemach okiapolakti Jesús ipan atentli Jordán. Ijkon nochiua ijkuak se noapolaktia. Kachtopa kuajli kipolaktiaj ijtik atl, niman kuakon kikixtiaj. Pampa Juan kichiua yejuin, miyekej kixmatij ken Juan akin teapolaktia noso Bautizante. San ika, ¿tleka okiapolakti Jesús?

Juan okichiuj, pampa Jesús ijkuak itech ouajla okitlajtlanili ijkon makichiuili. Juan kinnapolaktia akin kinekij kiteititiskej ika kinyolkokoua nochi tlen xkuajli yokichiujkej. San ika, ¿okichiuj Jesús itlaj itech tlen noneki manoyolkuepa? Ka, Jesús xkeman itlaj okichiuj pampa yejua iKoneuj toTajtsin, akin oualeuj iluikak. Ika yejon, onka okse tlen ika kijlia Juan makiapolakti. Matikmatikan tlenon.

Ijkuak Jesús xiuajlaya kampa Juan, kojxinketl katka. Se kojxinketl kichijchiua miyek tlemach ika kojtin, ken mesas, sillas niman bancos. Iueuentsin María, José, kojxinketl katka, niman noijki okimachti Jesús makichiua yejuin tekitl. San ika, toTajtsin xokuajtitlan ikoneuj ipan tlaltikpaktli manochiua kojxinketl. Onka okse tlen melak noneki makichiua niman oyejkok tonajli ijkuak kipiya ika kichiuas. Ika yejon, pampa Jesús kineki kiteititis ika kichiuas tlen toTajtsin okinauati, kijlia Juan makiapolakti. ¿Kiyolpaktia yejuin toTajtsin?

Kema, pampa ijkuak Jesús kisa ijtik atl, kakisti se tlajtojli itech iluikak tlen kijtoua: ‘Yejuin nokoneuj, akin nechyolpaktia’. Noijki, nesi ijkuak iluikak tlapoui niman yejuin paloma temoua ipan Jesús. San ika, xmelauak se paloma, san ijkon nesi. Yejuin iespíritu santo toTajtsin.

Aman Jesús kipiya ika kinemilis miyek tlemach, ika yejon, yauj kampa xakaj nemi 40 tonaltin. Ompa uajlauj Satanás kampa yejua nemi. Yexpa Satanás kiyejyekoua ika Jesús maka makintlakamati itlanauatiluan toTajtsin. San ika, Jesús xkichiua yejuin.

Sakin, ijkuak Jesús nokuepa kimixmati sekimej tlakamej akin kachtopa peuaj kitokaj, kimixmatij ken inomachtijkauan. Sekimej intoka: Andrés, Simón Pedro, Felipe iuan Natanael (noijki kixmatij ken Bartolomé). Jesús iuan yejuin tlakamej yauej kampa idistrito Galilea. Niman noteltiaj ipan kalpan Caná kampa ualeua Natanael, ompa Jesús kichiua kachtopa milagro, kampa nonamiktilo. ¿Tikmatstika tlenon kichiua? Kichiua ika atl manokuepa vino.

Mateo 3:13-17,NM; Mateo 4:1-11,NM; Mateo 13:55; Marcos 6:3; Juan 1:29-​51,NM; Juan 2:1-12.