BONA leeba le le theogelago hlogong ya monna yo. Monna yo ke Jesu. Ga bjale o na le nywaga e ka bago e 30. Monna yo a nago le yena ke Johane. Re šetše re ithutile se itšego ka yena. Na o a gopola ge Maria a be a etetše Elisabetha motswalo wa gagwe gomme ngwana yo a bego a le ka mpeng ya gagwe a tshela ka lethabo? Yena ngwana yoo a bego a sešo a belegwa e be e le Johane. Eupša Johane le Jesu ba dira’ng bjale mo seswantšhong?

Johane o sa tšwa go ina Jesu ka meetseng a Noka ya Jorodane. Ye ke tsela yeo motho a kolobetšwago ka yona. Sa pele o inwa ka meetseng ke moka a ntšhwa. Ka ge se e be e le seo Johane a bego a se dira batho, o be a bitšwa Johane Mokolobetši. Eupša ke ka baka la’ng Johane a ile a kolobetša Jesu?

Johane o dirile se ka gobane Jesu o ile a tla go yena a mo kgopela gore a mo kolobetše. Johane o be a kolobetša batho bao ba bego ba nyaka go bontšha gore ba a itshola ka baka la dilo tše mpe tšeo ba di dirilego. Eupša na Jesu o be a kile a dira selo le ge e le sefe se sebe seo a bego a swanetše go itshola ka baka la sona? Aowa, le ka mohla ga se a ka a dira sebe ka gobane ke Morwa wa Modimo yo a tšwago legodimong. Ka gona o ile a kgopela Johane gore a mo kolobetše bakeng sa lebaka le lengwe leo le fapanego. Anke re bone gore lebaka leo e be e le lefe.

Pele ga ge Jesu a ka tla go Johane, e be e le mmetli. Mmetli ke motho yo a dirago dilo ka kota, dilo tše di swanago le ditafola, ditulo le dipanka. Josefa monna wa Maria e be e le mmetli gomme o be a rutile Jesu gore le yena e be mmetli. Eupša Jehofa o be a se a romela Morwa wa gagwe lefaseng gore e tle e be mmetli. Modimo o be a mo neile modiro o kgethegilego wo a bego a swanetše go o dira gomme nako ya gore a thome go o dira e be e fihlile. E le go bontšha gore bjale o be a tlile go dira thato ya Tatagwe, Jesu o ile a kgopela Johane gore a mo kolobetše. Na Modimo o ile a thabišwa ke se?

Ee, se ile sa mo thabiša ka gobane ge Jesu a etšwa ka meetseng, lentšu leo le tšwago legodimong le ile la re: ‘Yo ke Morwa wa ka, yo ke kgahlwago ke yena.’ Le gona magodimo a ile a bulega gomme leeba le la theogela go Jesu. Eupša e be e se leeba la kgonthe. E be e le selo sa go swana le leeba. Ge e le gabotse, e be e le moya o mokgethwa wa Modimo.

Ga bjale Jesu o be a na le dilo tše dintši tšeo a bego a swanetše go nagana ka tšona, ka gona o ile a ya mo go se nago motho lešokeng gomme a hlwa moo ka matšatši a 40. Ge a le moo Sathane o ile a tla go yena. Sathane o ile a leka Jesu ka makga a mararo gore a robe melao ya Modimo. Eupša Jesu a gana go dira seo.

Ka morago ga moo, Jesu o ile a boa gomme a gahlana le banna ba bangwe bao e ilego ya ba balatedi ba gagwe ba pele goba barutiwa. Maina a ba bangwe ba bona e be e le Andrea, Petro (yo gape a bego a bitšwa Simone), Filipi gotee le Nathaniele (yo gape a bego a bitšwa Baratholomeo). Jesu le barutiwa ba ba gagwe bao a bego a sa tšwa go ba hwetša ba ile ba tloga ba ya seleteng sa Galilea. Ge ba fihla moo, ba dula motseng wa gabo Nathaniele wa Kana. Ge Jesu a le moo, o ile a ya monyanyeng o mogolo wa lenyalo gomme a dira mohlolo wa gagwe wa pele. Na o a tseba gore mohlolo woo ke ofe? O ile a fetoša meetse gore e be beine.

Mateo 3:13-17; 4:1-11; 13:55; Mareka 6:3; Johane 1:29-51; 2:1-12.